இந்த பூச்சாண்டிக்கெல்லாம் பயப்பட மாட்டேன். ஐடி ரெய்டு குறித்து துரைமுருகன்
- IndiaGlitz, [Saturday,March 30 2019]
வேலூர் காட்பாடி காந்தி நகரில் உள்ள தி.மு.க. பொருளாளர் துரைமுருகனின் வீட்டில் வருமான வரி துறையினர் நேற்று நள்ளிரவு சோதனை நடத்த வந்தனர். ஆனால் துரைமுருகனின் வழக்கறிஞர்கள் மற்றும் தி.மு.க. தொண்டர்கள் கடும் எதிர்ப்பு தெரிவித்ததோடு அதிகாரிகளுடன் வாக்குவாதத்திலும் ஈடுபட்டனர். இதனால் சிலமணிநேரம் வரை அதிகாரிகள் சோதனை நடத்த முடியாமல் காத்திருந்தனர். அதன்பின் காலை 3 மணியளவில் துரைமுருகன் வீட்டில் தொடங்கிய சோதனை சுமார் ஐந்து மணி நேரம் நடந்தது.
மேலும் துரைமுருகனின் மகன் கதிர் ஆனந்துக்கு சொந்தமான பொறியியல் கல்லூரி, பள்ளிகளிலும், வாணியம்பாடியில் உள்ள தி.மு.க. முன்னாள் மாவட்ட செயலாளர் தேவராஜ் வீட்டிலும் சோதனை நடந்ததாக செய்திகள் வெளிவந்துள்ளது. ஆனால் இந்த சோதனையில் சிக்கியது குறித்து இதுவரை எந்த தகவலும் இல்லை
இந்த நிலையில் ஐடி ரெய்டு குறித்து செய்தியாளர்களிடம் பேசிய துரைமுருகன், 'வேலூர் தொகுதியில் கதிர்ஆனந்தின் வெற்றி பிரகாசமாக உள்ளது. அதனை திசைதிருப்பவே வருமான வரித்துறை சோதனை நடந்து வருகிறது. தேர்தல் நேரத்தில் சோதனை நடத்த வேண்டிய அவசியம் என்ன..? போன மாதம் எங்கள் வீட்டிற்கு சோதனை நடத்த வந்திருக்கலாமே?:
எங்களை நேருக்கு நேர் எதிர்கொள்ளாமல் வருமான வரித்துறையினரை விட்டு முதுகில் குத்துகின்றனர். சோதனை என்ற பூச்சாண்டிக்கெல்லாம் நாங்கள் பயப்பட மாட்டோம் என்று கூறினார்,