కొత్త తార‌ల‌తో సినిమాలు రూపొందించి సంచ‌ల‌న విజ‌యాలు అందుకునే ద‌ర్శ‌కులు చాలా త‌క్కువ మందే ఉంటారు. వారిలో ద‌ర్శ‌కుడు తేజ ఒక‌రు. 'చిత్రం', 'జ‌యం' చిత్రాల‌తో.. నూత‌న న‌టీన‌టుల‌తోనూ ఘ‌న‌విజ‌యాలు అందుకోవ‌చ్చ‌ని నిరూపించి తెలుగులో ఓ కొత్త ఒర‌వ‌డిని తీసుకువ‌చ్చిన తేజ‌.. ఈ రెండు చిత్రాల మ‌ధ్య‌లో 'నువ్వు నేను' సినిమా రూపొందించి సంచ‌ల‌న ద‌ర్శ‌కుడిగా పేరు తెచ్చుకున్నారు.

జ‌యం త‌రువాత 15 ఏళ్ళ పాటు స‌రైన విజ‌యం లేక‌పోయినా.. గ‌తేడాది విడుద‌లైన 'నేనే రాజు నేనే మంత్రి' మంచి విజ‌యం సాధించ‌డంతో మ‌ళ్ళీ స‌క్సెస్ ట్రాక్‌లోకి వ‌చ్చారు తేజ‌. ప్ర‌స్తుతం కొత్త తార‌ల‌తోనే మ‌రో చిత్రం చేయ‌డానికి ఆయన స‌న్నాహాలు చేసుకుంటున్నారు. ఇదిలా ఉంటే.. ఛాయాగ్రాహ‌కుడిగా కెరీర్‌ను ఆరంభించి ద‌ర్శ‌కుడిగా మారిన తేజ‌కు ఈ రోజు (జూన్ 16) ఎంతో స్పెష‌ల్‌. ఎందుకంటే.. ఆయ‌న తొలి సినిమా 'చిత్రం' విడుద‌లై నేటితో 18 ఏళ్ళు పూర్త‌య్యింది. మున్ముందు కూడా ఆయ‌న ప్ర‌యాణం స‌క్సెస్‌ఫుల్‌గా కొన‌సాగాల‌ని ఆశిద్దాం.