అప్ప‌టి వ‌ర‌కు చాక్లెట్ బోయ్‌, ల‌వ‌ర్‌బోయ్ అనే ఇమేజ్‌తో సినిమాలు చేసుకుంటూ వ‌చ్చిన రామ్‌ను స‌రికొత్త‌గా ఆవిష్క‌రించిన చిత్రం ‘ఇస్మార్ట్ శంక‌ర్‌’. డాషింగ్ డైరెక్ట‌ర్ పూరీ జ‌గ‌న్నాథ్ త‌న‌దైన మాస్ యాంగిల్‌లో తెలంగాణ పోర‌డుగా రామ్‌ను వెండితెర‌పై ప్రెజెంట్ చేశాడు. ఇక రామ్ మాస్‌కు న‌భా న‌టేశ్‌, నిధి అగ‌ర్వాల్ గ్లామ‌ర్ తోడయ్యాయి. ఇవ‌న్నీ ఓ ఎత్తైతే మ‌ణిశ‌ర్మ సంగీతం మ‌రో ఎత్తు. చాలా కాలంగా స‌రైన మ్యూజిక్ ఆల్బ‌మ్ ఇవ్వ‌ని మ‌ణిశ‌ర్మ మ‌రోసారి త‌న బాణీల‌లోని ప‌వ‌ర్‌ను కొత్త‌గా ఎలివేట్ చేశాడు. ప్ర‌తిపాట అంద‌రినీ మెప్పించింది. రామ్ కెరీర్‌లోనే హ‌య్య‌స్ట్ గ్రాస‌ర్ మూవీగా నిలిచిన ఇస్మార్ట్ శంక‌ర్‌.. చాలా కాలంగా హిట్ లేని పూరీ జ‌గ‌న్నాథ్‌ను మ‌ళ్లీ నిల‌బెట్టింది.

ఇప్పుడు ఈ సినిమా యూ ట్యూబ్‌లో రికార్డుల‌ను కొల్ల‌గొడుతుంది. సాధార‌ణంగా త‌న తెలుగు డ‌బ్బింగ్ సినిమాల‌కు హిందీలో మంచి ఆద‌ర‌ణ ద‌క్కుతుంది. ఈ కోవ‌లో ఇస్మార్ట్ శంక‌ర్ హిందీ అనువాదం యూ ట్యూబ్‌లో వంద మిలియన్ వ్యూస్‌ను క్రాస్ చేయ‌డం విశేషం. ఇప్పుడు ఈ సినిమాను బాలీవుడ్‌లోనూ రీమేక్ చేయ‌డానికి స‌న్నాహాలు జ‌రుగుతున్నాయని టాక్ విన‌ప‌డుతోంది.