రీమేక్‌లో న‌టించ‌డానికి విశ్వ‌క్‌సేన్ ఓకే అంటాడా?
- IndiaGlitz, [Thursday,June 11 2020]
వెళ్లిపోమాకే సినిమాతో హీరోగా కెరీర్‌ను స్టార్ట్ చేసిన విశ్వ‌క్‌సేన్‌కు ఈన‌గ‌రానికి ఏమైంది సినిమా మంచి గుర్తింపును తెచ్చిపెట్టింది. ఈ సినిమా త‌ర్వాత త‌నే స్వీయ ద‌ర్శ‌క నిర్మాణంలో హీరోగా చేసిన ఫ‌ల‌క్‌నుమాదాస్ మరింత మంచి పేరును, గుర్తింపు ఇచ్చింది. అదే స‌మ‌యంలో నాని నిర్మాత‌గా శైలేష్ కొల‌ను ద‌ర్శ‌క‌త్వంలో చేసిన హిట్ డీసెంట్ హిట్ అయ్యింది. సినిమా క‌మ‌ర్షియ‌ల్‌గా మంచి స‌క్సెస్ కావ‌డం విశ్వ‌క్‌సేన్‌కు బాగానే క‌లిసొచ్చింది. ఇప్పుడు విశ్వ‌క్ పాగ‌ల్ అనే సినిమాలో న‌టిస్తున్నాడు. ఓ ట్రెండ్‌ను ఫాలో అవుతూ యూత్‌కు ద‌గ్గ‌ర‌య్యే ప్ర‌య‌త్నం చేస్తున్నాడు విశ్వ‌క్ సేన్.
ఈ క్ర‌మంలో విశ్వ‌క్‌సేన్ ద‌గ్గ‌ర‌కు ఓ క్రేజీ ఆఫ‌ర్ వ‌చ్చిందని టాక్‌. వివ‌రాల్లోకెళ్తే.. ప్ర‌ముఖ నిర్మాత ప్ర‌సాద్ వి.పొట్లూరి పీవీపీ బ్యాన‌ర్‌పై ఓ త‌మిళ సినిమాను రీమేక్ చేయాల‌నుకుని హ‌క్కులు సంపాదించాడు. ఆ సినిమానే ‘ఓ మై క‌డ‌వులే’. ప్ర‌స్తుతం పెళ్లి, విడాకులుపై యువ‌త ఆలోచ‌న‌లు ఎలా ఉన్నాయి. అనే అంశాల‌తో ఈ సినిమా రూపొందింది. ఈ సినిమాలో న‌టించాల‌ని పీవీపీ విశ్వ‌క్ ద‌గ్గ‌ర‌కు ప్ర‌పోజ‌ల్ తెచ్చాడ‌ట. అయితే ప్ర‌స్తుతం విశ్వ‌క్ వెళుతున్న ట్రాక్ వేరే. మ‌రి ఈ రీమేక్‌లో న‌టించ‌డానికి విశ్వ‌క్ సేన్ ఒప్పుకుంటాడో లేదో అనేది ఆస‌క్తిక‌రంగా మారింది. త్వ‌ర‌లోనే ఈ విష‌యంపై ఓ క్లారిటీ రానుంది.