ఇటీవల కాలంలో తమిళ రాజకీయాల్లో కీలక పరిణామాలు చోటు చేసుకుంటున్నాయి. ఆది నుంచి సీఎం అభ్యర్థిగా ఉండాలని భావించిన శశికళ రాజకీయాల నుంచి తప్పుకుంటున్నట్టు ప్రకటించారు. అవినీతి, అక్రమాస్థుల కేసులో నాలుగేళ్ల జైలుశిక్ష అనంతరం బెంగళూరు జైలు నుంచి విడుదలై వచ్చిన తమిళ చిన్నమ్మ శశికళ వస్తూ వస్తూనే సంచలనం రేపిన విషయం తెలిసిందే. ఏఐఏడీఎంకే జెండా ఉన్న కారుతో ర్యాలీ నిర్వహించి ఒక్కసారిగా ఆమె తిరుగుబాటు సంకేతాలు కూడా ఇచ్చారు. అటువంటిది ఒక్కసారిగా ఆమె అస్త్ర సన్యాసం చేశారు. రాజకీయాల్నించే తప్పుకుంటున్నాని ప్రకటించి పెను సంచలనానికి దారి తీశారు. ఆమె తీసుకున్న నిర్ణయంపై తమిళనాడులో పెద్ద ఎత్తున చర్చ జరిగింది.

ఇదిలా ఉండగా.. తాజాగా అన్నాడీఎంకే కూటమికి డీఎండీకే గుడ్‌బై చెప్పేసింది. సీట్ల సర్దుబాటుపై ఏకాభిప్రాయం రాకపోవడంతో గుడ్‌బై చెబుతున్నట్టు వెల్లడించింది. గత కొన్నాళ్లుగా నెలకొన్న ప్రతిష్ఠంభనకు ఫుల్‌స్టాప్‌ పెడుతూ కూటమి నుంచి వైదొలగుతున్నట్టు ప్రకటించింది. మంగళవారం ఉదయం కోయంబేడులోని డీఎండీకే కార్యాలయంలో ఆ పార్టీ జిల్లా కార్యదర్శుల సమావేశంలో తీసుకున్న నిర్ణయం ప్రకారం కూటమి నుంచి వైదొలగుతున్నట్లు పార్టీ అధ్యక్షుడు విజయకాంత్‌ ప్రకటించారు. అన్నాడీఎంకే కూటమి నుంచి వైదొలగినట్టు విజయ కాంత్‌ ప్రకటన జారీచేయగానే కోయంబేడులోని పార్టీ కార్యాలయం వద్ద వేలాదిమంది కార్యకర్తలు పెద్దపెట్టున నినాదాలు చేస్తూ హర్షం ప్రకటించారు.

అయితే ఈ రెండు పరిణామాల వెనుక బయటకు కనిపిస్తున్న కారణాలు వేరు.. లోగుట్టు మరొకటి ఉందని తెలుస్తోంది. నిజానికి సర్వేలన్నీ అన్నాడీఎంకేకు వ్యతిరేకంగా వచ్చాయని సమాచారం. ఈ సారి అన్నాడీఎంకే దారుణమైన పరాజయాన్ని చవిచూడాల్సి వస్తుందని సర్వేలు తేల్చి చెప్పినట్టు తెలుస్తోంది. ఈ నేపథ్యంలో శశకళ అన్నాడీఎంకే తరుఫున రంగంలోకి దిగితే ఒకవేళ పార్టీ ఘోర పరాజయాన్ని చవిచూస్తే ఒక గోల్డెన్ లెగ్ అన్న టాక్‌ను సొంతం చేసుకోవాల్సి వస్తుందని శశికళ భయపడుతున్నట్టు తెలుస్తోంది. మరోవైపు భారీగా పుంజుకున్న డీఎంకేకు తన అవినీతి, అక్రమాస్తుల కేసు అస్త్రంగా మారి ఆ పార్టీ విజయావకాశాలు మరింత మెరుగు పడేందుకు తనే ఆస్కారమిచ్చినట్టు అవుతుందని శశికళ వెనక్కి తగ్గినట్టు తెలుస్తోంది.

అన్నాడీఎంకే కూటమినుంచి వైదొలగటం వల్ల తమ పార్టీకి దీపావళి పండుగ వచ్చినట్టుందని.. తమ పార్టీకి నేడే దీపావళి అని డీఎండీకే నేతలు వెల్లడించారు. ఓ వైపు సీట్ల కేటాయింపులపై అన్నాడీఎంకే అధిష్ఠానంతో చర్చలు జరుపుతూనే మరో వైపు డీఎండీకే మూడు రోజులపాటు అన్ని నియోజకవర్గాల్లో పోటీ చేయడానికి దరఖాస్తులు సమర్పించిన అభ్యర్థులకు ఇంటర్వ్యూలు నిర్వహించింది. దీనిని బట్టి ముందుగానే అన్నాడీఎంకేతో విడిపోయేందుకు ఆ పార్టీ మానసికంగా సిద్ధమై ఉందని తెలుస్తోంది. డీఎండీకే జిల్లా కార్యదర్శుల సమావేశం ముగిసిన తర్వాత ఆ పార్టీ డిప్యూటీ ప్రధాన కార్యదర్శి ఎల్‌కే సుధీష్‌ మీడియాతో మాట్లాడుతూ.. అసెంబ్లీ ఎన్నికల్లో అన్నాడీఎంకే అన్ని చోట్లా డిపాజిట్లు కోల్పోతుందని శాపనార్థాలు పెట్టారు. 234 నియోజకవర్గాలలోనూ అన్నాడీఎంకే కూటమికి డిపాజిట్లు కూడా రావని పేర్కొన్నారు. మొత్తానికి తమిళ రాజకీయాలు ఆసక్తికర అంశాలతో దేశం మొత్తాన్ని తమ వైపు తిప్పుకుంటున్నాయనడంలో సందేహం లేదు.