அஜித் நடிக்கும் 58வது படத்திற்கு 'விசுவாசம்' என்ற டைட்டில் வைக்கப்பட்டுள்ளது அனைவரும் அறிந்தததே. கடந்த சில ஆண்டுகளாக அஜித் நடிக்கும் படத்தின் டைட்டில் படப்பிடிப்பு நடைபெறும்போதுதான் வெளியாகும். ஆனால் இந்த படத்தின் டைட்டில் கமல், ரஜினி படங்கள் போன்று படப்பிடிப்பு தொடங்கும் முன்பே அறிவிக்கப்பட்டுள்ளதே முதல் ஆச்சரியம்

மேலும் அஜித் நடித்த முந்தைய படமான 'விவேகம்' எதிர்பார்த்த வெற்றியை பெறாததால் அந்த படத்தின் தயாரிப்பாளருக்கு எதிர்பார்த்த லாபம் கிடைக்கவில்லை என்பதால் அவருக்கே மீண்டும் ஒரு படம் நடித்த கொடுக்க முடிவு செய்துள்ளார் அஜித்.  அதேபோல் 'விவேகம்' பட இயக்குனர் சிவாவை அஜித் ரசிகர்களே சிலர் வெறுத்துள்ளனர். மீண்டும் சிவா இயக்கத்தில் அஜித் நடிக்க கூடாது என்று சமூக வலைத்தளங்களில் பதிவு செய்து வருகின்றனர். எனவே தன்னால் அவருக்கு கெட்ட பெயர் உண்டாகக்கூடாது, மீண்டும் அவரை ஒரு வெற்றிப்பட இயக்குனராக மாற்ற வேண்டும் என்பதால் மீண்டும் சிவாவுக்கு வாய்ப்பு கொடுத்ததாக கூறப்படுகிறது. இந்த இருவருக்கும் அஜித் காட்டும் விசுவாசத்தை மறைமுகமாக குறிப்பிடவே படத்தின் டைட்டிலை முதலில் வெளியிட்டதாக கூறப்படுகிறது.

மேலும் வீரம் படத்தில் தம்பி செண்டிமெண்ட், வேதாளம் படத்தில் தங்கை செண்டிமெண்ட், விவேகம் படத்தில் மனைவி செண்டிமெண்ட் என தொடர்ந்து செண்டிமெண்ட் கலந்த ஆக்சன் படங்களில் நடித்து வரும் அஜித், இந்த படத்தில் நண்பன் செண்டிமெண்ட் கதையில் நடிக்கக்க்கூடும் என்றும், விசுவாசமான நண்பனுக்கு துரோகம் செய்பவர்களுக்கு விசுவாசம் என்றால் என்ன என்பதை தனது பாணியில் புரிய வைப்பதே இந்த படத்தின் கதை என்றும் கூறப்படுகிறது.

மொத்தத்தில் இந்த படம் குடும்பத்துடன் பார்க்கும் வகையில் ஒரு செண்டிமெண்ட் படம் என்றும், அதே நேரத்தில் மீடியமான பட்ஜெட்டில் தயாரிக்கப்பட்டு தயாரிப்பாளருக்கு லாபத்தை தரும் வகையில் உருவாக்கப்படும் என்றும் கூறப்படுகிறது.