మెగాప‌వ‌ర్‌స్టార్ రామ్‌చ‌ర‌ణ్ ప్ర‌స్తుతం రాజ‌మౌళి ద‌ర్శ‌క‌త్వంలో యంగ్ టైగ‌ర్ ఎన్టీఆర్ హీరోగా ‘రౌద్రం ర‌ణం రుధిరం(ఆర్ఆర్ఆర్‌)’లో న‌టిస్తోన్న సంగ‌తి తెలిసిందే. ఈ సినిమా త‌ర్వాత రామ్‌చ‌ర‌ణ్ ఏ సినిమా చేయ‌బోతున్నాడ‌నే దానిపై స‌ర్వ‌త్రా ఆస‌క్తి నెల‌కొంది. చ‌ర‌ణ్ త‌దుప‌రి సినిమా డైరెక్ట‌ర్స్‌పై ప‌లువురి పేర్లు వినిపించాయి. కొర‌టాల శివ‌, గౌత‌మ్ తిన్న‌నూరి, అనీల్ రావిపూడి త‌దిత‌రుల పేర్లు ప్ర‌ముఖంగా వినిపించాయి. అయితే లేటెస్ట్ స‌మాచారం మేర‌కు లాక్‌డౌన్ స‌మ‌యంలో క‌థ‌లు వింటూ వ‌చ్చిన రామ్‌చ‌ర‌ణ్ .. తాజాగా డైరెక్ట‌ర్ వెంకీ కుడుముల ద‌ర్శ‌క‌త్వంలో సినిమా చేయ‌డానికి గ్రీన్ సిగ్న‌ల్ ఇచ్చిన‌ట్లు సినీ వ‌ర్గాల స‌మాచారం.

అయితే మ‌రో ప‌క్కచిరంజీవి ‘ఆచార్య‌’లోనూ రామ్‌చ‌ర‌ణ్ కీల‌క పాత్ర‌లో న‌టించాల్సి ఉంది. మ‌రో వైపు ‘ఆర్ఆర్ఆర్‌’ చిత్రీక‌ర‌ణే పూర్తి కాలేదు. అది పూర్త‌యిన త‌ర్వాత ఆచార్య పూర్తి కావాలి. దాని త‌ర్వాతే చ‌ర‌ణ్ నెక్ట్స్ మూవీపై మ‌రింత క్లారిటీ వ‌చ్చే అవ‌కాశం ఉంటుంది. చ‌ర‌ణ్ తాజా చిత్రం ‘ఆర్ఆర్ఆర్‌’ క‌రోనా వైర‌స్ ప్ర‌భావం కార‌ణంగా షూటింగ్ ఆగింది. ఇప్ప‌టికే 75 శాతం చిత్రీక‌ర‌ణ పూర్త‌య్యింది. చ‌ర‌ణ్ స‌ర‌స‌న ఆలియా భ‌ట్ హీరోయిన్‌గా న‌టిస్తుంది.