சூப்பர் ஸ்டார் ரஜினிகாந்த் நடித்து வரும் 'பேட்ட' திரைப்படத்தின் இறுதிக்கட்ட படப்பிடிப்பு நடந்து வரும் நிலையில் இந்த படத்தின் படப்பிடிப்பின்போது எடுக்கப்பட்ட ஒரு புகைப்படத்தின் மூலம் ரஜினிகாந்த் இந்த படத்தில் மிசா கைதியாக நடித்திருப்பதாக தெரிகிறது.

கடந்த 1975ஆம் ஆண்டு இந்திராகாந்தியின் ஆட்சி காலத்தில் மிசா சட்டம் கொண்டு வரப்பட்டது. இந்த சட்டத்தின் கீழ் மு.க.ஸ்டாலின் உள்பட பல அரசியல் கட்சி தலைவர்கள் கைது செய்யப்பட்டு சிறையில் அடைக்கப்பட்டனர். இந்த நிலையில் தற்போது வெளிவந்திருக்கும் ரஜினியின் புகைப்படத்தில் அவரது கையில் உள்ள ஒரு டாட்டூவில் 'மிசா 109' என்று குறிப்பிடப்பட்டுள்ளது. எனவே இந்த படத்தின் பிளாஷ்பேக் காட்சியில் ரஜினி மிசா கைதியாக நடித்திருக்க வாய்ப்பு இருப்பதாக கூறப்படுகிறது.

தாதா வேடத்தில் ரஜினிகாந்த் நடிக்கும் இந்த படத்தில் அவருக்கு ஜோடியாக சிம்ரன், த்ரிஷா நடித்து வருகின்றனர். மேலும் இந்த படத்தில் விஜய்சேதுபதி, நவாசுதீன் சித்திக், பாபி சிம்ஹா, மேகா ஆகாஷ் உள்ளிட்டோர் நடிக்கிறார்கள். அனிருத் இசை அமைக்கும் இந்த படத்தை கார்த்திக் சுப்புராஜ் இயக்கி வருகிறார்.