నందమూరి బాలకృష్ణ, బోయపాటి శ్రీను కాంబినేషన్‌లో మూడో మూవీ రూపొందుతోన్న సంగతి తెలిసిందే. ఈ సినిమా కోసం అభిమానులెంతో ఆసక్తిగా ఎదురుచూస్తున్నారు. అందుకు కారణం బాలయ్య, బోయపాటి కాంబోలో వచ్చిన 'సింహా', 'లెజెండ్' వంటి సూపర్‌హిట్‌ చిత్రాలే. ఇప్పటికే ఓ షెడ్యూల్‌ చిత్రీకరణ పూర్తయ్యింది. వీలైనంత త్వరగా బాలయ్య సినిమాను పూర్తి చేసేయాలనుకుంటే కరోనా వైరస్‌ అడ్డం పడింది. కోవిడ్‌ ఎఫెక్ట్‌తో దాదాపు ఆరునెలల పాటు సినిమా షూటింగ్ ఆగిన సంగతి తెలిసిందే. ఇప్ప‌టికే నాగార్జున‌, చైత‌న్య వంటి స్టార్స్ సెట్స్‌పైకి వెళ్లిపోయారు. మిగిలిన‌ స్టార్స్ కూడా వారి సినిమాలను స్టార్ట్ చేస్తున్నారు.

తాజా స‌మాచారం ప్ర‌కారం ఇప్పుడు బాల‌కృష్ణ కూడా త‌న 106 కోసం సెట్స్‌పైకి వెళ్ల‌డానికి ఓకే అన్నాడ‌ట‌. న‌వంబ‌ర్ నుండి సినిమా షూటింగ్ స్టార్ట్ అవుతుంద‌ని, అందుకోసం యూనిట్ స‌భ్యులు లొకేష‌న్స్ సెర్చ్ చేస్తున్నార‌ని వార్త‌లు వినిపిస్తున్నాయి. ఈ చిత్రంలో బాల‌కృష్ణ డ్యూయెల్ రోల్ చేస్తున్నారు. అందులో ఓ పాత్ర అఘోరా పాత్ర అని స‌మాచారం. ఇప్ప‌టికే విడుద‌లైన ఈ సినిమా ప్రోమోలో బాల‌య్య ఓ లుక్‌లో ఎలా ఉంటాడ‌నేది తెలిసింది. ద్వార‌కా క్రియేష‌న్స్ బ్యాన‌ర్‌పై మిర్యాల ర‌వీంద‌ర్ రెడ్డి నిర్మిస్తోన్న చిత్ర‌మిది. దసరా సందర్భంగా ఈ సినిమా టైటిల్‌ను అనౌన్స్ చేస్తారని వార్తలు వినిపిస్తున్నాయి.