அஜித் உதவி செய்தாரா? இல்லையா? மாறுபட்ட கருத்துக்களால் குழப்பம்
- IndiaGlitz, [Thursday,May 03 2018]
அஜித் யாருக்கும் தெரியாமல் செய்த உதவிகள் பல என்றும், அந்த உதவிகள் ஒருசில ஆண்டுகள் கழித்து உதவி பெற்றவர்களே கூறும்போதுதான் அது வெளியுலகிற்கு தெரிய வரும் என்றும் கூறப்படுவதுண்டு. இந்த நிலையில் அஜித் ஒரு உதவி இயக்குனருக்கு உதவி செய்தாரா? இல்லையா? என்பது குறித்த ஒரு விவாதம் காரசாரமாக கடந்த இரண்டு நாட்களாக நடைபெற்று வருகிறது.
அஜித் பிறந்த தினத்தில் அவருக்கு வாழ்த்து கூறிய இயக்குனர் சுசீந்திரன், தான் உதவி இயக்குனராக இருந்தபோது தன்னுடைய சக உதவி இயக்குனர் ரோஜாரமணன் என்பவர் உடல்நலமின்றி இருந்ததாகவும், அவருக்கு அஜித் ஒரு பெரிய தொகையை கொடுத்து உதவி செய்ததாகவும் கூறினார்.
ஆனால் இலக்கியன் என்பவர் தன்னுடைய முகநூலில் அஜித்திடம் சுசிந்திரனுடன் தானும் அந்த உதவி இயக்குனருக்காக உதவி கேட்க சென்றது உண்மைதான் என்றும் ஆனால் அஜித் பண உதவி செய்யவில்லை என்றும், சுசீந்திரன் விளம்பரத்திற்காக தவறான தகவலை பதிவு செய்வதாகவும் குற்றஞ்சாட்டியிருந்தார்.
ஆனால் சுசீந்திரனுடன் அஜித்தை பார்க்க சென்ற இன்னொரு இயக்குனரான ரமேஷ் சுப்பிரமணியன் என்பவர் இந்த சம்பவம் நடந்தபோது தான் உடனிருந்ததாகவும், அஜித் ரோஜாரமணன் ஆபரேசனுக்கு தேவையான பணம் முழுவதையும் கொடுக்க தயாராக இருந்ததாகவும், ஆனால் ஆபரேசன் செய்யும் அளவிற்கு அவருடைய உடல்நலம் இல்லாததால் மருத்துவ செலவிற்கு மட்டும் தனது மேனேஜர் மூலம் ரூ.20 ஆயிரம் கொடுத்ததாகவும் கூறியுள்ளார்.
ரோஜாரமணன் சிகிச்சைக்கு அஜித் செய்ததாகவும், உதவி செய்யவில்லை என்றும் இருவேறு கருத்துக்கள் வெளிவந்து கொண்டிருக்கின்றன. உதவி பெற்றதாக கூறப்படும் ரோஜாரமணன் தற்போது உயிருடன் இல்லை. இந்த நிலையில் அஜித்தே முன்வந்து இந்த விவகாரத்தில் என்ன நடந்தது என்று கூறினால்தான் உண்மை தெரியவரும். ஆனால் அது சாத்தியமில்லை என்பதால் இந்த உதவி விவகாரம் கடைசி வரை கேள்விக்குறியோடு தான் இருக்கும் என்பது குறிப்பிடத்தக்கது.