మెగా ప్రిన్స్ వరుణ్ తేజ్ ఫిదా`, తొలిప్రేమ` సినిమాలతో వరుస విజయాలు అందుకుని అభిమానుల‌ను, ప్రేక్ష‌కుల‌ను ఆకట్టుకున్నారు. విభిన్నమైన కథలను ఎంచుకుంటూ కెరీర్‌ను విజయపథంలో నడిపిస్తున్నారు. తొలిప్రేమ` తర్వాత తన తదుపరి చిత్రాన్ని.. ఘాజీ` వంటి విజయవంతమైన చిత్రాన్ని రూపొందించిన సంకల్ప్ రెడ్డి దర్శకత్వంలో చేయనున్నారు వ‌రుణ్‌. అంతరిక్ష నేపథ్యంతో సాగే ఈ సినిమాలో వరుణ్ తేజ్ వ్యోమగామిగా నటిస్తున్నారు. తన పాత్ర కోసం ప్రత్యేకమైన శిక్షణ కూడా వరుణ్ తీసుకుంటున్నారని నిర్మాత తెలిపారు.

ఇక ఈ చిత్రానికి అహం బ్రహ్మస్మి` టైటిల్‌ను పరిశీలిస్తున్నారు. ఈ విషయాన్ని త్వరలో అధికారికంగా ప్రకటించనున్నారు. కేవలం 25 కోట్ల రూపాయలతో తెరకెక్కించబోతున్న ఈ మూవీని.. ఫస్ట్ ఫ్రేమ్ ఎంటర్‌టైన్‌మెంట్స్‌ పతాకంపై రాజీవ్ రెడ్డి నిర్మిస్తున్నారు. ప్రస్తుతం ప్రీ ప్రొడక్షన్ పనులను జరుపుకుంటున్న ఈ చిత్రానికి సంబంధించి.. మే నుంచి నిరవధికంగా చిత్రీకరణ ప్రారంభించి.. ఏడాది చివరిలో విడుదల చేయడానికి నిశ్చయించుకున్నారు నిర్మాత. ఈ సినిమాకి దర్శకుడు క్రిష్ జాగర్లమూడి సమర్పకుడు, సహనిర్మాత కాగా.. జ్ఞానశేఖర్ సినిమాటోగ్రఫీ అందించనున్నారు.