தான் படித்த கல்லூரிக்கு ரூ.315 கோடி நன்கொடை வழங்கிய இன்ஃபோசிஸ் நந்தன் நீலேகணி!
- IndiaGlitz, [Tuesday,June 20 2023]
இன்ஃபோசிஸ் நிறுவனத்தின் இணை நிறுவனராக இருந்துவரும் நந்தன் நீலேகணி இந்தியாவின் முக்கிய ஐஐடி நிறுவனங்களுள் ஒன்றான பாம்பே ஐஐடி நிறுவனத்திற்கு ரூ.315 கோடி நன்கொடை வழங்கியிருப்பதாகத் தகவல் வெளியாகி இருக்கிறது.
முன்னணி தகவல் தொழில்நுட்ப நிறுவனமான இன்ஃபோசிஸ் நிறுவனத்தின் மேலாண் இயக்குநர், தலைமைச் செயல் இயக்குநர் என்று பல்வேறு பதவிகளை வகித்துப் பின்னர் இணை நிறுவனராக இருந்துவரும் நந்தன் நீலேகணி பாம்பே ஐஐடி நிறுவனத்திற்கு ரூ.315 கோடியை நன்கொடையாக வழங்கியுள்ளார். இந்த நிதி அந்த நிறுவனத்தின் மேற்கட்டுமான பணிகளுக்கு பயன்படுத்த இருப்பதாகவும் தகவல் கூறப்படுகிறது.
பெங்களூருவில் பிறந்து வளர்ந்த நந்தன் நீலேகணி அங்குள்ள பிஷப் காட்டன் பாய்ஸ் பள்ளியில் படிப்பை முடித்துள்ளார். பின்பு மும்பை ஐஐடி நிறுவனத்தில் பொறியியல் பட்டத்தை முடித்துள்ளார். அடுத்து பத்னி கம்பியூட்டர் சிஸ்டம்ஸ் நிறுவனத்தில் பணியாற்றிய இவர் தொழிலதிபர் நாராயண மூர்த்தியுடன் பழக்கம் ஏற்பட்டு இன்போசிஸ் நிறுவனத்தில் பணியாற்றத் துவங்கினார். முதலில் தகவல் தொழில்நுட்ப அதிகாரியாக தனது பணியைத் துவங்கிய அவர் முதன்மை நிர்வாக அதிகாரி, மேலாண் இயக்குநர், அடுத்து உட் தலைவர் என்று படிப்படியாக வளர்ச்சி அடைந்தார்.
தற்போது இணை நிறுவனராக இருந்துவரும் நிலையில் தன்னை வளர்த்தெடுத்த பாம்பே ஐஐடி நிறுவனத்திற்கு மரியாதை செலுத்தும் விதமாக ரூ.315 கோடியை நன்கொடையாக அளித்துள்ளார். இதற்கு முன்பு அதே நிறுவனத்திற்கு ரூ.80 கோடியை நன்கொடையாக அளித்த நிலையில் இதுவரை அவர் ரூ.400 கோடி ரூபாய் நன்கொடை அளித்திருப்பதும் குறிப்பிடத்தக்கது.
இதுகுறித்து பேசிய நந்தன் நீலேகணி ‘ஐஐடி – பாம்பே என் வாழ்க்கையின் எனக்கு அடித்தளமாக அமைந்தது. எனது பயணத்தின் துவக்கப்புள்ளி. இந்த நன்கொடை நிதி சார்ந்த பங்களிப்பு என்பதை விடவும் அதிகம். எனக்கு அனைத்தும் அதிகம் கொடுத்த இடத்திற்கு நான் செய்யும் ஒரு மரியாதை இது. நாளை நம் உலகத்தை வடிவமைக்கும் மாணவர்களுக்கு ஒரு அர்ப்பணிப்பு‘ என்று கூறியிருப்பதும் குறிப்பிடத்தக்கது.
To mark 50 years of my association with @iitbombay, I am donating ₹315 crores to my alma mater. I am grateful to be able to do this🙏
— Nandan Nilekani (@NandanNilekani) June 20, 2023
Full release: https://t.co/q6rvuMf2jn pic.twitter.com/f8OEfZ1UTq