சென்னை சூப்பர் கிங்ஸ் அணியில் இணைந்துவிட்டாலே தன்னாலே தமிழ் உணர்வும், தமிழ் டுவீட்டும் வீரர்களிடையே வந்துவிடும் என்பதை ஏற்கனவே பார்த்தோம். ஹர்பஜன்சிங் உள்பட ஒருசில சிஎஸ்கே வீர்ர்கள் ஏற்கனவே தமிழில் டுவீட் செய்திருந்தனர்.

இந்த நிலையில் இன்று இரவு சென்னை சூப்பர் கிங்ஸ் அணி, தமிழர் தினேஷ் கார்த்திக் கேப்டனாக உள்ள கொல்கத்தா நைட்ரைடர்ஸ் அணியுடன் மோதவுள்ளது. இந்த நிலையில் இந்த போட்டி குறித்து சிஎஸ்கே வீரர் இம்ரான் தாஹிர் தமிழில் டுவீட் ஒன்றை பதிவு செய்துள்ளார்.

இன்றிரவு நடைபெறும் போட்டியை எதிர்கொள்ள மிகுந்த ஆர்வத்துடன் உள்ளேன். சென்னை ரசிகர்களின் ஆதரவு எங்களுக்கு முழு அளவில் இருக்கும் என்ற நம்பிக்கை என்னிடம் உள்ளது என்று கூறிவிட்டு பின்னர் தமிழில் 'இது அன்பால சேர்ந்த கூட்டம், அழிக்க முடியாது, எடுடா வண்டியை, போடுடா விசிலை' என்று கூறியுள்ளார்.

ஏற்கனவே இம்ரான் தாஹிர் கடந்த மார்ச் 6ஆம் தேதி 'என் இனிய தமிழ் மக்களே. வணக்கம். சிங்கார சென்னைக்கு நாளை வந்துவிடுவேன். உங்கள் அன்பும் ஆதரவும் எதிர்பார்த்து வரும் உங்கள் அன்பு சகோதரன். வரோம், தட்றோம், தூக்கறோம். எடுடா வண்டிய, போடுடா விசில' என்று பதிவு செய்திருந்தார் என்பது குறிப்பிடத்தக்கது.