இளையராஜாவுக்கு சென்னை பத்திரிகையாளர் சங்கம் கண்டனம்
- IndiaGlitz, [Friday,December 18 2015]
அனிருத் இசையில் சிம்பு பாடியதாக கூறப்படும் பீப் பாடல் குறித்த கேள்விக்கு இசைஞானி இளையராஜா கோபமாக பத்திரிகையாளர்களிடம் நடந்து கொண்டதாக நேற்று செய்திகள் வெளியானது. இந்நிலையில் இளையராஜாவுக்கு சென்னை பத்திரிகையாளர்கள் சங்கம் தங்கள் கண்டனத்தை தெரிவித்துள்ளது. இதுகுறித்து பத்திரிகையாளர் சங்கம் வெளியிட்டுள்ள அறிக்கையில் கூறியிருப்பதாவது:
சென்னையில் சினிமா விழா ஒன்றில் கலந்து கொண்ட இசையமைப்பாளர் இளையராஜாவிடம், தற்போது சர்ச்சையை ஏற்படுத்தியுள்ள சிம்பு, அனிரூத்தின் பீப் சாங் பாடல் குறித்து சத்தியம் தொலைக்காட்சியின் நிருபர் கேள்விக்கு பதில் சொல்லாமல், என்னை கேள்வி கேட்க உனக்கு தகுதி இருக்கா, அறிவு இருக்கா என்று மிகவும் தரக்குறைவாக திட்டினார். இளையராஜாவின் தரக்குறைவான பேச்சையும், அவரின் செயல்பாடுகளையும் சென்னை பத்திரிகையாளர் சங்கம் வன்மையாக கண்டிக்கிறது.
சிம்பு, அனிருத்தின் பீப் சாங் பாடல், பெண்களை மிக கேவலமாக சித்திரித்துள்ளதற்கு இசையமைப்பாளர் இளையராஜா வருத்தம் தெரிவித்து இருக்க வேண்டும். அதற்கு மாறாக கேள்வி கேட்ட நிருபரை தரக்குறைவாக பேசியது இளையராஜாவின் உண்மையான முகத்திரை வெளிச்சத்துக்கு வந்துள்ளது. இளையராஜவின் பத்திரிகை சுந்தந்திரத்திற்கு எதிரான செயல்பாடுகளை கண்டித்து, சென்னை பத்திரிகையாளர் சங்கம் விரைவில் ஆர்ப்பாட்டம் நடத்த முடிவு செய்துள்ளது.
இவ்வாறு அந்த செய்திக்குறிப்பில் தெரிவிக்கப்பட்டுள்ளது.