శ్రీదేవి పాట‌లో న‌టిస్తున్న‌ది పూజా హెగ్డే క‌దా. `వాల్మీకి` సినిమా కోసం `వెల్లువ‌చ్చి గోదార‌మ్మా ఎల్లాకిల్లా ప‌డ్దాద‌మ్మా` అనే పాట‌ను రీమిక్స్ చేస్తున్నారు. అందులో న‌టిస్తున్న‌ది పూజా హెగ్డే క‌దా... మ‌రి ఇలియానా సీన్‌లోకి ఎప్పుడొచ్చింది అని అనుకుంటున్నారా? మీరంటున్న‌ది నిజ‌మే. పూజా హెగ్డే చేస్తున్న శ్రీదేవి పాట తెలుగు సినిమా కోసం. ఇలియానా చేస్తున్న పాట హిందీ సినిమా కోసం. ఇలియానా ఫోక‌స్ మొత్తం ఇప్పుడు హిందీ సినిమాల మీదే ఉంది. ఆమె న‌టిస్తున్నతాజా సినిమా `పాగ‌ల్ పంతీ`. అనీల్ బ‌జ్మి ద‌ర్శ‌క‌త్వం వ‌హిస్తున్నారు.

ఈ సినిమా ఇలియానా ప‌క్క‌న జాన్ అబ్ర‌హామ్ క‌నిపిస్తారు. జాన్ అబ్ర‌హామ్‌తో క‌లిసి ఇలియానా ఓ పాట‌కు స్టెప్పులేయ‌నున్నారు. ఆ పాట రీమిక్స్ సాంగ్‌. అంటే ఒక‌ప్పుడు ఒక ఊపు ఊపిన `చాల్ బాజ్‌`లోని `తేరా బీమార్ మేరా దిల్‌` అనే పాట‌న్న‌మాట‌. అప్ప‌ట్లో ఆ సినిమాలో స‌న్నీ డియోల్‌, శ్రీదేవి కెమిస్ట్రీ సినీ ప్రియుల‌ను ఓ ఊపు ఊపింది. కానీ తాజాగా వారి కెమిస్ట్రీని తెర‌పై తీసుకురావ‌డానికి జాన్ అబ్ర‌హామ్ , ఇలియానా సై అంటున్నారు. ఈ పాట‌తో పాటు మ‌రో పాట‌లో కూడా వారిద్ద‌రూ క‌లిసి స్టెప్పులేయ‌నున్నారు. ఆ పాట ఏంటనేది తెలియాల్సి ఉంది.

శ్రీదేవి చ‌నిపోయి ఏడాది అయిన‌ప్ప‌టికీ, సినిమాల రూపంలో ఆమె ఇంకా ప్రేక్ష‌కుల ముందుకు ఏదో ఒక తీరులో వ‌స్తూనే ఉంది. శ్రీదేవి బంగ్లా అని ఓ సినిమా, మొన్న‌టికి మొన్న అజిత్ చేసిన నెర్కొండ‌పార్వై, ఇప్పుడు తెలుగులో ఒక పాట‌, హిందీలో ఇంకో పాట‌. అజ‌రామ‌రం చెంద‌డం అంటే ఇదేనేమో. ఇవ‌న్నీ ఒక ఎత్తు. ఆమె కుమార్తె జాన్వీ క‌పూర్ ఒక ఎత్తు. కుమార్తెను సినిమాల్లో స‌క్సెస్‌ఫుల్ నాయిక‌గా చూసుకోవాల‌ని శ్రీదేవి అనుకున్నారు. ఆ కోరిక తీర‌కుండానే ఆమె క‌న్నుమూశారు. కానీ కుమార్తె మాత్రం ఇప్పుడు బాలీవుడ్‌లో వ‌రుస సినిమాలు చేస్తూనే ఉన్నారు. ద‌క్షిణాదిన సినిమాలు చేయ‌డానికి కూడా త‌న‌కేం అభ్యంత‌రం లేద‌ని ఆమె తెలిపారు.