இளையதளபதி விஜய் நடித்த 'புலி' படத்திற்கு இதுவரை இல்லாத அளவிற்கு மிகப்பெரிய எதிர்பார்ப்பு இருக்கின்றது என்பதை அதன் டிரைலருக்கு கிடைத்த வரவேற்பில் இருந்தே அனைவருக்கும் தெரிய வந்தது. இந்த படத்தின் டிரைலர் வெளியீட்டு விழா கடந்த ஞாயிறு அன்று சன் டிவியில் ஒளிபரப்பானபோது அதற்கு கூட விஜய் ரசிகர்கள் சமூக வலைத்தளத்தில் ஒரு ஹேஷ்டேக் உருவாக்கி அதையும் டிரெண்ட் ஆக்கினார்கள்.

இந்நிலையில் இந்த டிரைலர் வெளியீட்டு விழா நாளை மலையாள தொலைக்காட்சியான சூர்யா டிவியில் ஒளிபரப்பாக உள்ளது. இதுவரை எந்த ஒரு தமிழ்ப் படத்தின் ஆடியோ வெளியீட்டு விழாவும் மலையாள சேனலில் ஒளிபரப்பானது இல்லை என்பது குறிப்பிடத்தக்கது.

கேரளாவில் விஜய்க்கு அதிகளவு ரசிகர்கள் இருப்பதால் அவரது படங்கள் தமிழகத்தை அடுத்து கேரளாவிலும் அதிகளவு வசூலை குவித்து வருகிறது. எனவே விஜய்யின் கேரள ரசிகர்களுக்காக இந்த டிரைலர் வெளியீட்டு விழா மலையாள சேனலில் மதியம் 3 மணிக்கு ஓளிபரப்பாகவுள்ளதாக கூறப்படுகிறது. நாளை மறுநாள் கேரளாவில் ஓணம் பண்டிகை கொண்டாடவுள்ள நிலையில் விஜய் ரசிகர்களுக்கு இந்த டிரைலர் விழா ஓணம் பண்டிகை விருந்தாக இருக்கும் என எதிர்பார்க்கப்படுகிறது.இந்த படம் வரும் அக்டோபர் 1ஆம் தேதி உலகம் முழுவதும் ரிலீஸ் ஆகிறது என்பது குறிப்பிடத்தக்கது.