இளையராஜாவின் 1001-வது படத்தின் இசை வெளியீடு விழா தேதி
- IndiaGlitz, [Wednesday,March 16 2016]
இசைஞானி இளையராஜா 'தாரை தப்பட்டை' படத்துடன் 1000 படங்களுக்கு இசையமைத்து கின்னஸ் சாதனை செய்துள்ள நிலையில் அவருடைய இசைப்பயணம் வெற்றிகரமாக தொடர்ந்து கொண்டே உள்ளது. இந்நிலையில் அவருடைய 1001வது படத்தின் இசை வெளியீட்டு விழா வரும் 20ஆம் தேதி நடைபெறவுள்ளதாக கூறப்படுகிறது.
அர்ஜூன், மனீஷா கொய்ராலா நடிப்பில் உருவாகியுள்ள 'ஒரு மெல்லிய கோடு' என்ற திரைப்படம்தான் இளையராஜாவின் 1001வது படம் என்ற போஸ்டர் சற்று முன்னர் சமூக இணையதளங்களில் வெளியாகியுள்ளது. குப்பி, வனயுத்தம் ஆகிய உண்மைச்சம்பவங்கள் குறித்த படத்தை இயக்கிய ஏ.எம்.ஆர். ரமேஷ் இந்த படத்தை இயக்கியுள்ளார். இந்த படத்தில் பிரபல நடிகர் ஷாம் முக்கிய கதாபத்திரத்தில் நடித்துள்ளார் என்பது குறிப்பிடத்தக்கது.
அக்ஷயா கிரியேஷன்ஸ் தயாரித்துள்ள இந்த படத்தில் கிருஷ்ணா ஸ்ரீராம் ஒளிப்பதிவும், கிருஷ்ண ரெட்டி படத்தொகுப்பும் செய்துள்ளனர். கடந்த சில மாதங்களுக்கு முன்னர் மர்மமான முறையில் மரணம் அடைந்த முன்னாள் மத்திய அமைச்சர் ஒருவரின் மனைவி குறித்த கதைதான் இந்த படம் என்று கூறப்படுகிறது.