வைகோவுடன் இணைகிறாரா இளையராஜா?
- IndiaGlitz, [Tuesday,October 17 2017]
இந்தியாவின் முதல் பெண் விடுதலைப் போராட்ட வீராங்கனை என்ற பெரும்புகழை பெற்ற ராணி வேலுநாச்சியாரின் நாடகம் சமீபத்தில் சென்னையில் நடந்தது. இந்த நாடகத்தை நேரில் பார்த்து ரசித்த மதிமுக பொதுச்செயலாளர் வைகோ, இந்த நாடகத்தை திரைப்படமாக தானே தயாரிக்கவிருப்பதாக அறிவித்தார்.
ஸ்ரீராம் சர்மா இயக்கவுள்ள இந்த படத்தின் ஆரம்பகட்ட பணிகள் தொடங்கிவிட்ட நிலையில் வேலுநாச்சியார் கேரக்டர் உள்பட பிற கேரக்டர்களில் நடிக்கும் நட்சத்திரங்களின் தேர்வுகள் நடைபெற்று வருகிறது. வேலுநாச்சியாரின் கேரக்டரில் நடிக்க முன்னணி நடிகை ஒருவரிடம் பேச்சுவார்த்தை நடந்து வருவதாகவும் இதுகுறித்த அறிவிப்பு மிக விரைவில் வெளிவரும் என்றும் கூறப்படுகிறது.
இந்த நிலையில் இந்த படத்திற்கு இசையமைக்க இசைஞானி இளையராஜாவிடம் பேச்சுவார்த்தை நடந்து வருவதாக கூறப்படுகிறது. இளையராஜாவின் தீவிர ரசிகரான வைகோ, வரலாற்று சிறப்புமிக்க இந்த படத்தில் இசைஞானி இசையமைக்க வேண்டும் என்று தனிப்பட்ட முறையில் விருப்பம் தெரிவித்ததாக கூறப்படுகிறது. இந்த செய்தி உறுதி செய்யப்பட்டால் இந்த படத்தில் இசைஞானி ஒரு இசை ராஜாங்கத்தையே நடத்திவிடுவார் என்பதில் எந்தவித ஐயமும் இல்லை.