தளபதி விஜய்யை வைத்து ஒரு படமாவது இயக்க வேண்டும் என்பதே இன்றைய இளையதலைமுறை இயக்குனர்களின் வாழ்நாள் ஆசையாக உள்ளது என்பது அனைவரும் அறிந்ததே. இந்த நிலையில் கமல், அஜித் உள்பட பல முன்னணி நடிகர்கள் நடித்த பல வெற்றிப்படங்களை இயக்கிய கவுதம் மேனனுக்கும் அந்த ஆசை இருக்கும் என்பதை மறுக்க முடியாது.

கவுதம் மேனன் இயக்கிய 'அச்சம் என்பது மடமையடா' படத்தின் நாயகி மஞ்சிமா இயக்குனர் கவுதம் மேனனிடம் எப்போது விஜய் அவர்களை வைத்து ஒரு படம் இயக்குவீர்கள் என்று கேட்ட கேள்விக்கு கவுதம் மேனன் பதிலளித்த வீடியோ தற்போது இணையதளங்களில் வைரலாகி வருகிறது.

கவுதம் மேனன் இதுகுறித்து கூறியபோது, 'விஜய் அவர்களை வைத்து ஒரு படம் எடுக்க வேண்டும் என்று எனக்கு ரொம்ப ஆசை. ஏற்கனவே ஒரு படம் கமிட் ஆகியிருந்த நிலையில் இந்த படம் வேண்டாம் வேறு ஒரு படத்தில் நாம் இணைவோம் என்று விஜய் கூறியிருந்தார். அதன்பின்னர் அவரை ஒருமுறை சந்தித்துள்ளேன். கண்டிப்பாக விஜய் படத்தை இயக்கும் வாய்ப்பு கிடைக்கும் என்று நம்புகிறேன். அப்படி வாய்ப்பு கிடைத்தால் கண்டிப்பாக அது போலீஸ் ஸ்டோரியாக இருக்காது. லவ் மற்றும் ஆக்சன் கலந்த ஒரு படமாக இருக்கும்' என்று கூறினார்.

விஜய்யின் 63வது படத்தை இயக்க ஏற்கனவே ஒரு இயக்குனர்கள் கூட்டமே காத்திருக்கும் நிலையில் தற்போது கவுதம் மேனனும் அந்த காத்திருக்கும் பட்டியலில் இணைந்துள்ளார்.