வெங்கட்பிரபுவின் அடுத்த படத்தில் டாக்டர் ராஜசேகர்?
- IndiaGlitz, [Wednesday,May 24 2017]
பிரபல தெலுங்கு நடிகர் டாக்டர் ராஜசேகரை அவ்வளவு சீக்கிரமாக தமிழ் ரசிகர்கள் மறந்துவிட முடியாது. இவர் நடித்த 'இதுதாண்டா போலீஸ்' தமிழகத்தில் மிகப்பெரிய ஹிட்டாகியது. தெலுங்கில் பல வெற்றி படங்களை இவர் கொடுத்திருந்தாலும் இவரது சொந்த ஊர் தமிழகத்தை சேர்ந்த தேனி என்பது குறிப்பிடத்தக்கது.
இந்த நிலையில் நீண்ட இடைவெளிக்கு பின்னர் டாக்டர் ராஜசேகர் நேரடி தமிழ்ப்படம் ஒன்றில் முக்கிய வேடம் ஒன்றில் நடிக்கவுள்ளார். ஆம், 'சென்னை 600028', 'மங்காத்தா' உள்பட பல வெற்றி படங்களை இயக்கிய வெங்கட்பிரபு இயக்கவுள்ள அடுத்த படத்தில் டாக்டர் ராஜசேகர் முக்கிய கேரக்டரில் நடிக்கவுள்ளாராம். இரண்டு ஹீரோ கதையம்சம் கொண்ட இந்த படத்தில் இன்னொரு பிரபல நடிகர் முக்கிய கேரக்டரில் நடிக்கவுள்ளதாகவும் இதுகுறித்த தகவல் இன்னும் ஒருசில நாட்களில் வெளிவரும் என்றும் கூறப்படுகிறது.
இதுதாண்டா போலீஸ், மீசைக்காரன், மன்னிக்க வேண்டுகிறேன்' போன்ற தமிழ் படங்களுக்கு பின்னர் மீண்டும் டாக்டர் ராஜசேகரின் ஆக்ரோஷமான நடிப்பை தமிழ் ரசிகர்கள் பார்க்கும் நாள் வெகுதூரத்தில் இல்லை என்பது குறிப்பிடத்தக்கது.