காவிரி பிரச்சனை முன் எப்போதும் இல்லாத அளவிற்கு  தமிழகமே கொந்தளிப்பில் உள்ளது. தமிழக விவசாயிகளுக்கு கைகொடுக்க வேண்டிய நேரம் இதுதான் என்பதை சரியாக புரிந்து கொண்ட தமிழக மக்கள் ஒன்றிணைந்து காவிரிக்காக போராட்டம் நடத்தி வருகின்றனர்.

இந்த நிலையில் சென்னையில் நடைபெறும் ஐபிஎல் போட்டிகளை புறக்கணிக்க வேண்டும் என்ற குரல் ஓங்கி வருகிறது. இந்த நிலையில் ஐபிஎல் போட்டிகளின் வர்ணனையாளரும் பிரபல கிரிக்கெட் விமர்சகருமான சுமந்த்ராமன், காவிரி பிரச்சனைக்காக ஐபிஎல் போட்டி வர்ணனைகளை புறக்கணிப்பதாக தனது சமூக வலைத்தளத்தில் கூறியுள்ளார்.

இந்த ஆண்டின் எந்த ஐபிஎல் போட்டியிலும் வர்ணனையாளராக தான் கலந்து கொள்ள போவதில்லை என்றும், ஐபிஎல் குறித்த எந்த டிவி நிகழ்ச்சிகளிலும் பேசப்போவதில்லை என்று கூறியுள்ளார். வாழ்க்கையில் விளையாட்டை விட முக்கியமானது உள்ளது என்பதை அனைவரும் புரிந்து கொள்ள வேண்டிய நேரம் இது என்றும், நமது விவசாயிகளுக்காக நாம் அனைவரும் ஒன்றிணைந்து குரல் கொடுக்க வேண்டிய நேரம் இது என்றும் அவர் தனது சமூகவலைத்தளத்தில் கூறியுள்ளார்.