నేచురల్ స్టార్ నాని హీరోగా నటించిన చిత్రం ‘వి’. నేచుర‌ల్ స్టార్ నాని, సుధీర్ బాబు, అదితిరావు హైద‌రిల‌తో కలిసి టాలెంటెడ్ హీరోయిన్ నివేదా థామస్ కూడా ఈ సినిమాలో నటించింది. ఈ సినిమా గురించి పలు ఆసక్తికర విషయాలను ఈ ముద్దుగుమ్మ పంచుకుంది. టీజ‌ర్‌, ట్రైల‌ర్‌ను బ‌ట్టి చూస్తే నాని పాత్ర‌లో గ్రేషేడ్స్ క‌న‌బడుతుందని వెల్లడించింది. అంద‌రూ అత‌ని పాత్ర‌ను విల‌న్ అని అనేలా మ‌న‌కు డిజైన్ చేశారని నివేదా పేర్కొంది.

అయితే ఇప్పుడు నాని పాత్ర గురించి తాను చెప్ప‌కూడ‌దని... రేపు సినిమా చూసి మీరే తెలుసుకోవాలని నివేదా తెలిపింది. ఈ సినిమాలో న‌టించిన నాని, అదితి, సుధీర్ అంద‌రితో తనకు మంచి అనుబంధం ఉందని పేర్కొంది. ప్రొఫెష‌న‌ల్‌గానే కాదు.. వ్య‌క్తిగ‌తంగానూ వారు తనకు మంచి స్నేహితులని పేర్కొంది. ఇక డైరెక్ట‌ర్ మోహ‌నకృష్ణ‌గారితో ఇది వ‌ర‌కే ప‌నిచేశానని.. ఆయ‌న న‌టీన‌టుల ఎంపిక స్క్రిప్ట్‌ను బ‌ట్టే చేసుకుంటారని నివేదా వెల్లడించింది. కాబట్టి తనను ఈ సినిమాలో ఎంపిక చేసుకున్నారంటే ఆ పాత్ర‌కు తాను న్యాయం చేస్తాన‌నే ఆయ‌న భావించి ఉంటారని తెలిపింది. ప్ర‌తి ఒక్కరూ వారి పాత్ర‌ల‌ను గొప్ప‌గా చేశారని పేర్కొంది. ఓ మంచి సినిమాలో భాగ‌మ‌య్యాన‌ని న‌మ్మ‌కంగా చెప్ప‌గ‌ల‌నని నివేదా వెల్లడించింది.

శ్రీ వెంక‌టేశ్వ‌ర క్రియేష‌న్స్ బ్యాన‌ర్‌పై మోహ‌న‌కృష్ణ ఇంద్ర‌గంటి ద‌ర్శ‌క‌త్వంలో దిల్‌రాజు, శిరీష్‌, హ‌ర్షిత్ రెడ్డి ఈ చిత్రాన్ని నిర్మించారు. ఇప్పటి వరకు థియేటర్స్ కోసమే ఎదురు చూసిన ఈ చిత్రం.. పరిస్థితుల్లో మార్పులు లేకపోవడంతో.. ఓటీటీ ద్వారా ఈ చిత్రాన్ని విడుదల చేయాలని మేకర్స్ ఫిక్స్ అయ్యారు. అమెజాన్ ప్రైమ్‌లో సెప్టెంబ‌ర్ 5న ఈ చిత్రం విడుదల కాబోతోంది. నాని, సుధీర్ పాత్రలు ఈ సినిమాపై విపరీతమైన హైప్‌ను క్రియేట్ చేశాయి.