கடந்த சில நாட்களாகவே ஜல்லிக்கட்டுக்கு ஆதரவாக உலக நாயகன் கமல்ஹாசன் தொடர்ந்து தனது சமூக வலைத்தளங்களில் கருத்து தெரிவித்து வரும் நிலையில் தமிழர்களை பொறுக்கி என கூறிய பாஜக தலைவர்களில் ஒருவராகிய சுப்பிரமணியம் சுவாமிக்கு நேற்று நடந்த விழா ஒன்றில் பதிலடி கொடுத்துள்ளார்.

திரைப்பட ஒளிப்பதிவாளர் சங்கத்திற்கான இணையதள துவக்க விழா நேற்று சென்னையில் நடைபெற்றது. இந்த விழாவில் சிறப்பு விருந்தினராக கமல்ஹாசன் கலந்து கொண்டார். இந்த விழாவில் பேசிய கமல்ஹாசன், 'யாரோ ஒருவர் தமிழர்கள் எல்லாம் பொறுக்கிகள் என பேசியிருக்கிறார். ஆமாம். நான் கண்டிப்பாக தமிழ் பொறுக்கிதான். எங்கே சென்று பொறுக்க வேண்டும் என்பது எனக்கு தெரியும். ஆனால் கண்டிப்பாக டெல்லி சென்று பொறுக்க மாட்டேன். என்னடா இவன் திடீரென அரசியல் பேசுகிறானே என்று நினைக்காதீர்கள். நான் பேசுவது அரசியல் அல்ல. தன்மானம்' என்று கூறினார்.

மேலும் ஜல்லிக்கட்டு போராட்டத்தில் கலந்து கொள்வது குறித்து அவர் பேசியபோது, 'ஒரு வேளை நான் சினிமாவுக்கு வராமல், கலெக்டராகவோ, இன்ஜினியராகவோ இருந்திருந்தால் அலங்காநல்லூர் கிராமத்தில் இந்நேரம் நின்றிருப்பேன்' என்று கூறினார்.