ஆந்திரமாநிலம் அனந்தபூர் அடுத்த குண்டக்கல் பகுதியை சார்ந்த யோகி என்பவருக்கு கடந்த 6 மாதங்களுக்கு முன் அருணா என்ற பெண்மணியோடு திருமணம் நடந்திருக்கிறது. யோகி ஹைத்ராபாத்தில் வேலை பார்த்து வந்ததால் அங்கு இருவரும் குடியேறியதாகக் கூறப்படுகிறது. ஆரம்பத்தில் மகிழ்ச்சியாக இருந்த தம்பதிகள் கொஞ்ச நாட்களுக்குப் பின் கடும் வாக்குவாதம், சண்டை சச்சரவுகளில் ஈடுபட்டதாகவும் கூறப்படுகிறது.

கணவர் யோகி நீ கறுப்பாக இருக்கிறாய் என மனைவிமீது தொடர்ந்து குற்றச்சாட்டை வைத்ததாகக் கூறப்படுகிறது. நேற்று (ஆகஸ்ட் 18) காலை திடீரென்று இருவரும் வாக்குவாதத்தில் ஈடுபட்டபோது யோகி ஆத்திரத்தில் கத்தியை எடுத்து மனைவியின் கழுத்தை அறுத்து கொலை செய்திருக்கிறார். மேலும் தானும் தற்கொலைக்கு முயன்றதாகச் செய்திகள் தெரிவிக்கின்றன. தற்போது மிகவும் அபாயமான நிலையில் மருத்துவமனையில் சிகிச்சை பெற்று வருகிறார் எனறும் தகவல்கள் கிடைத்துள்ளன.

இந்தியா போன்ற நாடுகளில் வெள்ளையாக இருப்பது மட்டுமே அழகாகப் பார்க்கப்படுகிறது. கறுப்பு வேண்டாத நிறமாகவும் அசிங்கமாகவும் கருதும் எண்ணப்போக்கு இருந்து வருகிறது. இந்த எண்ணம் பலருக்கு இருந்தாலும் சில நேரங்களிலும் அது உயிரைக் குடிக்கும் அளவிற்கு செல்வதுதான் பயங்கர சோகத்தை வரவழைத்து விடுகிறது. தற்போது இக்கொலை சம்பவம் தொடர்பாக போலீஸார் வழக்குப் பதிவு செய்து விசாரணை செய்து வருகின்றனர் என்பதும் குறிப்பிடத்தக்கது.