அரியலூர் மாவட்டத்தைச் சேர்ந்த 75 ஆண்டுகால தம்பதிகள் காலையில் ஒருவரும் மாலையில் ஒருவரும் இறந்த சம்பவம் பெரும் பரபரப்பை ஏற்படுத்தி உள்ளது.

அரியலூர் மாவட்டம் ஜெயங்கொண்டம் என்ற பகுதியைச் சேர்ந்த காசான்கோட்டை கிராமத்தைச் சேர்ந்தவர்கள் சேதுமணியன் மற்றும் கமலம் தம்பதிகள். 75 ஆண்டுகளுக்கு முன் திருமணம் செய்த இவர்கள் ஒற்றுமையுடன் வாழ்ந்து வந்த நிலையில் வயது மூப்பு காரணமாக சேதுமணியன் நேற்று காலை உயிரிழந்தார். இதனையடுத்து அவருக்கு இறுதிச் சடங்கு செய்த பின்னர் உறவினர்கள் அனைவரும் அவரது மனைவி கமலம் அவர்களுக்கு கோடித்துணி போட்டுக் கொண்டிருந்தனர் அப்போது துயரம் தாங்காமல் அழுத அவர் திடீரென மயங்கி விழுந்தார் உடனடியாக அவர் மருத்துவமனைக்கு எடுத்துச் சென்ற நிலையில் ஏற்கனவே அவர் உயிரிழந்துவிட்டதாக மருத்துவர்கள் தெரிவித்தனர்.

கணவர் இறந்த துக்கம் தாங்காமல் மனைவியும் ஒருசில மணி நேரத்தில் இறந்ததை அடுத்து அவரது உடலை கணவரை அடக்கம் செய்த இடத்தின் அருகிலேயே அடக்கம் செய்தனர். 75 ஆண்டு காலமாக ஒன்றாக வாழ்ந்த தம்பதியினர் காலையில் ஒருவரும் மாலையில் இன்னொருவரும் இறந்த சம்பவம் அந்த கிராமத்தையே சோகத்தில் ஆழ்த்தியுள்ளது.