மனைவியின் கள்ளக் காதலால் அவமானம் அடைந்த கணவர் ஒருவர் குழந்தைகளுக்கு விஷம் கொடுத்து விட்டு தானும் விஷம் குடித்து தற்கொலை செய்ய முயன்ற சம்பவம் பெரும் அதிர்ச்சியை ஏற்படுத்தியுள்ளது

மதுரை மாவட்டம் பாலமேடு என்ற பகுதியை சேர்ந்த ஆட்டோ டிரைவர் குமார். இவருக்கு உஷா என்ற மனைவியும் 2 மகன்களும் உள்ளனர். இந்த நிலையில் உஷா பாலமேடு பேரூராட்சியில் ஒப்பந்தப் பணியாளராக வேலை பார்த்து வருகிறார். அவருக்கும் அதே பேரூராட்சியில் தூய்மை மேற்பார்வையாளராக வேலை பார்த்து வரும் கனகராஜ் என்பவருக்கும் திடீரென காதல் அரும்பியது

இந்த கள்ளக்காதல் குறித்து குமாருக்கு தெரிய வந்ததும் அதிர்ச்சி அடைந்த அவர், இருவரையும் எச்சரித்துள்ளார். ஆனால் இருவரும் தங்கள் உறவை கைவிடவில்லை. இதனால் கனகராஜை கொலை செய்ய முடிவு செய்த குமார், நேராக அரிவாளை எடுத்துக் கொண்டு அவருடைய அலுவலகம் சென்று அவரை சரமாரியாக வெட்டினார். இதனால் கனகராஜ் இறந்து விட்டார் என எண்ணி குமார் தனது குழந்தைகளுடன் தலைமறைவானார். ஆனால் கனகராஜ் படுகாயத்துடன் உயிர் தப்பினார் என்பதும் தற்போது அவர் மருத்துவமனையில் சிகிச்சை பெற்று வருகிறார் என்பதும் குறிப்பிடத்தக்கது,

இந்த நிலையில் மனைவி தன்னை ஏமாற்றியதால் ஏற்பட்ட அவமானம், கனகராஜை கொலை செய்ததால் ஜெயிலுக்கு போக வேண்டிய நிலை ஆகியவற்றை உணர்ந்த குமார், மன உளைச்சலுக்கு ஆளாகி இரண்டு குழந்தைகளுக்கும் விஷம் கொடுத்துவிட்டு தானும் விஷம் குடித்து விட்டார். இதுகுறித்து தகவல் அறிந்த போலீசார் மூவரையும் மருத்துவமனையில் அனுமதித்த நிலையில் சிகிச்சையின் பலனின்றி இரண்டு குழந்தைகளும் பரிதாபமாக மரணம் அடைந்துவிட்டதாகவும், குமார் மட்டும் தற்போது உயிருக்கு போராடியவாறு சிகிச்சை பெற்று வருகிறார் என்றும் தெரிகிறது.

இந்த நிலையில் இவை அனைத்திற்கும் காரணமான உஷா, தற்போது தலைமறைவாக இருப்பதாகவும் அவரை போலீஸ் தேடி வருவதாகவும் தகவல்கள் வெளிவந்துள்ளன