சிறுத்தை சிவா இயக்கத்தில் அஜித், காஜல் அகர்வால், அக்சரா ஹாசன் நடித்து வரும் தல 57' படத்தின் படப்பிடிப்பு பல்கேரியாவில் விறுவிறுப்புடன் நடந்து வருகிறது. இந்நிலையில் இன்று காலை முதல் அஜித் பல்கேரிய சாலையில் பைக் ஓட்டும் ஸ்டில்கள் இணையத்தை கலக்கி வருகின்றன

உண்மையில் இந்த ஸ்டில்களை வெளியிட்டவர் இந்த படத்தில் அஜித்துடன் பணிபுரியும் ஐரோப்பிய ஸ்டண்ட்மேன் Jorian Ponomareff என்பவர்தான். அவர் தனது சமூக வலைத்தளத்தில் அஜித் பைக்கில் இருக்கும் புகைப்படங்களை வெளியிட்டதோடு, 'இந்தியாவின் மிகப்பெரிய ஸ்டார் அஜித், என்னுடைய பைக்கில் பலவிதமான சாகசங்களை செய்துள்ளார். அவர்தான் உண்மையான பைலட். அதே நேரத்தில் அவருடைய எளிமை என்னை மிகவும் கவர்ந்துள்ளது' என்று பதிவு செய்துள்ளார். இந்த புகைப்படங்களை அஜித் ரசிகர்கள் இன்று காலை முதல் பெருமளவு ஷேர் செய்து வைரலாக்கி வருகின்றனர்.

'தல 57' படத்தின் படப்பிடிப்பு இறுதிக்கட்டத்தை நெருங்கிவிட்டதாகவும், இந்த படத்தின் டைட்டிலுடன் கூடிய ஃபர்ஸ்ட்லுக் வரும் பொங்கல் தினத்தில் வெளியாக வாய்ப்பு இருப்பதாகவும் படக்குழுவினர் தெரிவித்துள்ளனர்.