கோலிவுட் திரையுலகில் இசையமைப்பாளர்களில் நடிகர்களாக அவதாரம் எடுத்து வெற்றி பெற்றவர்கள் விஜய் ஆண்டனி மற்றும் ஜிவி பிரகாஷ். அந்த வரிசையில் கடந்த ஆண்டு 'மீசையை முறுக்கு' என்ற படத்தின் மூலம் நடிகராகவும், இயக்குனராகவும் புதிய அவதாரம் எடுத்தவர் இசையமைப்பாளர் ஹிப் ஹாப் தமிழா ஆதி. இந்த படம் நல்ல வரவேற்பை பெற்றது.

இந்த நிலையில் ஹிப் ஹாப் தமிழா ஆதி நடிக்கும் அடுத்த படம் கடந்த ஜனவரி மாதம் தொடங்கப்பட்டது. இயக்குனர் சுந்தர் சி தயாரிக்கும் இந்த படத்தின் முதல்கட்ட படப்பிடிப்பு காரைக்கால் பகுதியில் முடிவடைந்த நிலையில் படப்பிடிப்பின்போது ஆதிக்கு எதிர்பாராத வகையில் விபத்து ஏற்பட்டது. அதன் பின்னர் கோலிவுட் திரையுலகின் ஸ்டிரைக் காரணமாகவும் படப்பிடிப்பு நிறுத்தி வைக்கப்பட்டது. இந்த இடைப்பட்ட காலத்தில் படத்தின் பாடல்களை ஆதி கம்போஸ் செய்து முடித்துவிட்டார்.

இந்த நிலையில் தற்போது மீண்டும் இந்த படத்தின் படப்பிடிப்பு தொடங்கவுள்ளது. இந்தியாவின் தேசிய விளையாட்டான ஹாக்கி விளையாட்டு குறித்த கதையம்சம் கொண்ட இந்த படத்தை அறிமுக இயக்குனர் ஒருவர் இயக்கி வருகிறார்.