நடிகர் கமல்ஹாசன் வரும் 21ஆம் தேதி அரசியல் கட்சி தொடங்கவுள்ள நிலையில் அவரை சில அரசியல் தலைவர்களும், அவர் சில அரசியல் தலைவர்களையும் சந்தித்து வருகிறார். அந்த வகையில் இன்று மாலை முன்னாள் தலைமை தேர்தல் அதிகாரி டி.என்.சேஷனை கமல் சந்தித்த நிலையில் சற்றுமுன்னர், கமல்ஹாசனை இந்து மக்கள் கட்சி தலைவர் அர்ஜூன் சம்பத் சந்தித்துள்ளார்.

ரஜினியின் அரசியல் கொள்கையில் காவி நிறம் இல்லை என நம்புகிறேன்; அப்படி இருக்குமானால், அவருடன் கூட்டணிக்கு வாய்ப்பில்லை என்று கமல் கூறியிருந்த நிலையில் காவி நிறத்தை சேர்ந்த ஒரு தலைவர் கமல்ஹாசனை சந்தித்தது அனைவரையும் வியப்புக்கு உள்ளாக்கியுள்ளது. கமல்ஹாசனின் ஆழ்வார்ப்பேட்டை அலுவலகத்தில் நடந்த இந்த சந்திப்பு ஒரு மரியாதை நிமித்த சந்திப்பு என இருதரப்பில் இருந்தும் தெரிவிக்கப்பட்டுள்ளது.

இந்து மக்கள் கட்சியின் தலைவர் அர்ஜூன் சம்பத், கமல்ஹாசன் நடத்திய பிக்பாஸ் நிகழ்ச்சிக்கு எதிராக குரல் கொடுத்தவர் என்பதும் குறிப்பிடத்தக்கது