త‌మ నిర్మాత‌ల‌తో పోటీకి దిగుతున్న హీరోలు
- IndiaGlitz, [Saturday,May 19 2018]
చిత్ర పరిశ్రమలో ఎదురయ్యే పోటీ వాతావారణం చాలా చిత్ర విచిత్రంగా ఉంటుంది. ఒక్కోసారి తమతో క‌లిసి ప‌నిచేసిన వారితోనే పోటీకి దిగాల్సి ఉంటుంది. ఇప్పుడు అటువంటి పోటీయే తెలుగు సినీ పరిశ్రమలో మ‌రోసారి క‌నిపించ‌బోతోంది. కాస్త వివరాల్లోకి వెళితే.. 2015లో రవితేజ హీరోగా నటించిన ‘కిక్2’ సినిమాని నంద‌మూరి కల్యాణ్ రామ్ నిర్మించిన సంగ‌తి తెలిసిందే. అలాగే ఈ ఏడాది ఆరంభంలో రాజ్ తరుణ్ హీరోగా వచ్చిన ‘రంగుల రాట్నం’ సినిమాకి అక్కినేని నాగార్జున నిర్మాతగా వ్యవహరించారు.
అయితే.. ఈ రెండు సినిమాలు కూడా ఆశించిన విజయాన్ని అందించలేదు. క‌ట్ చేస్తే.. క‌లిసి ప‌నిచేసిన ఆ కాంబినేష‌న్ హీరోలు త‌మ కొత్త సినిమాలతో బ‌రిలోకి దిగుతున్నారు. రవితేజ కథానాయకుడిగా నటించిన ‘నేల టిక్కెట్టు’ సినిమా ఈ నెల 25న విడుదల కానుండగా.. ఇదే రోజున కల్యాణ్ రామ్, తమన్నా జంటగా నటించిన ‘నా నువ్వే’ చిత్రం కూడా ప్రేక్షకుల ముందుకు రానుంది. అలాగే.. రాజ్ తరుణ్ హీరోగా నటించిన ‘రాజుగాడు’ సినిమా జూన్ 1న రిలీజ్ కానుండగా.. ఇదే రోజు నాగార్జున నటించిన ‘ఆఫీసర్’ మూవీ కూడా విడుద‌ల‌కు ముస్తాబవుతోంది. క‌లిసి ప‌నిచేసినప్పుడు ద‌క్క‌ని విజ‌యాలు.. పోటీలో అయినా ద‌క్కుతాయేమో చూడాలి.