நேற்று நடைபெற்ற ஆஸ்கார் விருது வழங்கும் விழா மிக பிரமாண்டமாக நடைபெற்றது என்பதும் விருதுகளை பெற்ற நட்சத்திரங்கள் அனைவரும் மகிழ்ச்சியின் உச்சத்தில் இருந்தனர் என்பதும் தெரிந்ததே. ஆனால் விருது பெறாத நட்சத்திரங்களும், பார்வையாளர்களாக கலந்து கொண்ட நட்சத்திரங்களுக்கும் இந்த விழாவில் ஒரு இன்ப அதிர்ச்சி காத்திருந்தது. அதுதான் விழாவுக்கு வந்த அனைவருக்கும் அள்ளி அள்ளி வழங்கப்பட்ட பரிசுகள்

விழாவில் கலந்து கொண்ட அனைத்து நட்சத்திரங்களுக்கும் $138,000 மதிப்புள்ள பரிசுகள் வழங்கப்பட்டது. இவற்றில் 12 இரவுகள் பூமியின் சொர்க்கம் என்று அழைக்கப்படும் தான்சானியாவில் இரண்டு பேர் தங்கும் வசதி, ஹவாய் தீவில் நான்கு ஸ்டார் ஓட்டலில் ஒரு வாரம் தங்கும் வசதி, கிரீஸ் நாட்டின் ஆடம்பர வில்லாவில் தங்கும் வசதி வைர நெக்லஸ் என பரிசுகள் வழங்கப்பட்டன.

இவை போக ஐபோனுக்கு பயன்படுத்தப்படும் 3D சவுண்ட் ஸ்பீக்கர், ஏராளமான விலையுயர்ந்த மேக்கப் மற்றும் அழகு சாதன பொருட்கள், வோட்கா, ஜின் போன்ற பானங்களுடன் கூடிய காக்டெயில் பார்ட்டி, நகைகள் என பரிசுமழையை குவித்துவிட்டனர் ஸ்பான்சர்கள். அதுமட்டுமின்றி நட்சத்திரங்களுடன் வந்த பாதுகாப்பு அதிகாரிகளுக்கு பெப்பர் ஸ்ப்ரேயும் அளிக்கப்பட்டது. ஆஸ்கார் விருது கிடைக்கவில்லை என்றாலும் சுமார் ரூ.1 கோடி மதிப்புள்ள பரிசுப்பொருட்களால் நட்சத்திரங்களின் முகங்கள் ஜொலித்தன என்பதை சொல்லவே தேவையில்லை.