ஒரே நாளில் 2 போராட்டங்கள்: டிராபிக்கில் ஸ்தம்பித்தது சென்னை
- IndiaGlitz, [Thursday,January 24 2019]
ஜாக்டோ ஜியோ அமைப்பினர் பல்வேறு கோரிக்கைகளை வலியுறுத்தி மூன்றாவது நாளாக இன்றும் வேலைநிறுத்த போராட்டத்தில் ஈடுபட்டு வருகின்றனர். ஜாக்டோ ஜியோ அமைப்பினர் வரும் 25ஆம் தேதிக்குள் பணிக்கு திரும்ப வேண்டும் என்று சென்னை ஐகோர்ட் உத்தரவிட்டுள்ள நிலையில் இன்று சென்னையின் பல பகுதிகளில் இந்த அமைப்பினர்களின் போராட்டத்தால் சென்னையின் பல பகுதிகள் டிராபிக்கால் ஸ்தம்பித்துள்ளது.
இந்த நிலையில் கொடநாடு கொலை, கொள்ளை விவகாரத்தில் கவர்னர் உடனடியாக நடவடிக்கை எடுக்க வேண்டும் என்று கவர்னர் மாளிகை முன் திமுகவினர் போராட்டத்தில் ஈடுபட்டு வருகின்றனர். இதனையடுத்து கிண்டி கவர்னர் மாளிகை பகுதியில் போக்குவரத்து முற்றிலும் முடங்கியுள்ளது.
சென்னையில் சாதாரண நாட்களிலேயே பீக் ஹவர்களில் அதிக டிராபிக் இருந்து வருகிறது. இந்த நிலையில் ஒரே நாளில் இரண்டு போராட்டங்கள் நடந்து வருவதால் பள்ளி, கல்லூரி செல்லும் மாணவர்கள், அலுவலகம் செல்லும் பொதுமக்கள் உள்பட சென்னைவாசிகள் பெரும் அவதியில் சிக்கியுள்ளனர்.