எந்தவித திரையுலக பின்னணியும் இன்றி தானாகவே சின்ன சின்ன கேரக்டர்களில் நடித்து இன்று தமிழ் சினிமாவின் பிசியான நாயகர்களில் ஒருவராக இருந்து வரும் மக்கள் செல்வன் விஜய்சேதுபதி இன்று தனது பிறந்த நாளை கொண்டாடி வருகிறார். அவருக்கு நமது உளங்கனிந்த பிறந்த நாள் நல்வாழ்த்துக்களை தெரிவித்து கொள்கிறோம்.

இராஜபாளையம் மண்ணின் மைந்தனான விஜய்சேதுபதி சென்னைக்கு திரையுலக கனவுடன் வந்து முறைப்படி பாலுமகேந்திராவின் கூத்துப்பட்டறையில் நடிப்பு பயிற்சி பெற்று பின்னர் திரையுலகில் நுழைந்தார். முதலில் ஹீரோக்களுக்கு நண்பனாக ஒருசில படங்களில் நடித்த விஜய்சேதுபதி பின்னர் கார்த்திக் சுப்புராஜ் இயக்கத்தில் ஒருசில குறும்படங்களில் நடித்தார். அதன் பின்னர் 'வெண்ணிலா கபடிக்குழு', 'நான் மகான் அல்ல' போன்ற படங்களில் குறிப்பிடத்தக்க வேடங்களில் நடித்த விஜய்சேதுபதிக்கு திருப்புமுனையாக அமைந்த படம் சீனுராமசாமியின் 'தென்மேற்கு பருவக்காற்று'. இந்த படத்தின் வெற்றியால் கோலிவுட் திரையுலகில் ஒரு நாயகனாக ரசிகர்களால் ஏற்றுக்கொள்ளப்பட்டார்.

பின்னர் பீட்சா, நடுவுல கொஞ்சம் பக்கத்த காணோம், சூதுகவ்வும்' போன்ற படங்கள் விஜய்சேதுபதியை வெற்றி நாயகன் ஆக்கியது. கடந்த 2015ஆம் ஆண்டு விக்னேஷ் சிவன் இயக்கத்தில் வெளிவந்த 'நானும் ரெளடிதான்' படத்தின் மிகப்பெரிய வெற்றி விஜய்சேதுபதியை முன்னணி நடிகர்களின் பட்டியலுக்கு கொண்டு சென்றது.

கடந்த ஆண்டு விஜய்சேதுபதி நடித்த ஆறு படங்கள் வெளியான நிலையில் இந்த ஆண்டு அதற்கும் மேல் வெளியாக வாய்ப்பு உள்ளது. அதிக படங்கள் மட்டுமின்றி வெற்றி படங்களாக கொடுத்து வரும் விஜய்சேதுபதிக்கு மீண்டும் ஒருமுறை பிறந்த நாள் வாழ்த்துக்களை கூறிக்கொள்கிறோம்.