திரைப்பட நடிகை, தொலைக்காட்சி நடிகை, தயாரிப்பாளர், அரசியல்வாதி என பல்வேறு அவதாரங்களில் ஜொலித்து வரும் குஷ்பு அவர்களுக்கு IndiaGlitz சார்பில் உளங்கனிந்த பிறந்த நாள் வாழ்த்துக்கள்

குழந்தை நட்சத்திரமாக அறிமுகமான குஷ்பு கடந்த 1988ஆம் ஆண்டு சூப்பர் ஸ்டார் ரஜினிகாந்த் நடித்த 'தர்மத்தின் தலைவன்' படத்தின் மூலம் தமிழ்த்திரையுலகில் அறிமுகமானார். அதன் பின்னர்  அவர் நடித்த 'வருஷம் 16, 'வெற்றி விழா', 'கிழக்கு வாசல்', என தொடர்ச்சியாக வெற்றி படங்களில் நடித்ததால் குறுகிய காலத்தில் தமிழ் திரையுலகின் முன்னணி நடிகையாக மாறினார். 

கோவில் கட்டும் அளவுக்கு வெறித்தனமான ரசிகர்களை கொண்ட குஷ்பு தமிழ், தெலுங்கு, மலையாளம், கன்னடம் போன்ற தென்னிந்திய மொழிகள் மட்டுமின்றி பாலிவுட்டிலும் கால்பதித்துள்ளார். 'கிரி', 'கலகலப்பு', 'தீயா வேலை செய்யணும் குமாரு', 'அரண்மனை 2' ஆகிய படங்களை தயாரித்து ஒரு வெற்றி தயாரிப்பாளராகவும் உள்ளார்.

கடந்த 1997ஆம் ஆண்டு இயக்குனர் சுந்தர் சியை திருமணம் செய்த குஷ்புவுக்கு அவந்திகா, அனந்திதா ஆகிய இரு மகள்கள் உள்ளனர். 

திரையுலகில் மட்டுமின்றி அரசியலும் கால்பதித்த குஷ்பு, கடந்த 2010ஆம் ஆண்டு திமுகவில் இணைந்தார். திமுக தலைவர் கருணாநிதியின் நன்மதிப்பை பெற்றிருந்தாலும் சில கருத்துவேறுபாடுகள் காரணமாக 2014ஆம் ஆண்டு திமுகவில் இருந்து விலகிய குஷ்பு பின்னர் காங்கிரஸில் இணைந்தார். தற்போது அவர் காங்கிரஸ் கட்சியின் அகில இந்திய செய்தித்தொடர்பாளராக உள்ளார்

திரையுலகம், அரசியல் என இரண்டு துறைகளிலும் அவர் இன்னும் பல சாதனைகள் படைக்க இந்த இனிய பிறந்த நாளில் குஷ்புவுக்கு மீண்டும் பிறந்த நாள் நல்வாழ்த்துக்களை தெரிவித்து கொள்கிறோம்.