పాన్ ఇండియా ప్రేక్షకులు ఎదురుచూస్తున్న సినిమాల్లో 'హనుమాన్' ఒకటి. ప్రశాంత్ వర్మ(Prasanth Varma) దర్శకత్వంలో తేజ సజ్జ(Teja Sajja) హీరోగా ఇండియన్ సూపర్ హీరో మూవీగా ఈ మూవీ తెరకెక్కుతోంది. ఇప్పటికే ఈ సినిమా నుంచి విడుదలైన టీజర్.. పాటలు సినిమాపై భారీ అంచనాలు ఏర్పడేలా చేశాయి. తాజాగా చిత్రబృందం ఈ సినిమా ట్రైలర్(Hanuman Trailer) రిలీజ్ చేసింది. ఓ గ్రామంలో ఉండే హీరోకి సూపర్‌ పవర్ ఉంటుంది.

మరోవైపు ప‌వ‌ర్ సూట్‌లో ఉంటే స‌రిపోదు నాలో ఉండాలి. నా న‌ర‌న‌రాల్లో ఉండాలి అంటూ క‌రుడుగ‌ట్టిన విల‌న్‌గా విన‌య్ రాయ్ నటించాడు. ఆ శక్తి సామర్థ్యాలు హీరో దగ్గరి ఉన్నాయని తెలిసి అతడిపై దాడి చేస్తాడు. తేజా స‌జ్జాపై ఎటాక్ చేయ‌డానికి వ‌చ్చిన రౌడీల‌ను వ‌ర‌ల‌క్ష్మి శ‌ర‌త్‌కుమార్(Varalaxmi Sarathkumar) దంచికొట్టే యాక్షన్ ఎపిసోడ్ ఆక‌ట్టుకుంటుంది. ట్రైల‌ర్ చివ‌ర‌లో మాన‌వాళి మ‌నుగ‌డ‌ను కాపాడ‌టానికి నీ రాక అనివార్యం హ‌నుమా అనే డైలాగ్ ట్రైల‌ర్‌కు హైలైట్‌గా నిలిచింది. ఇందులో చూపించిన గ్రాఫిక్స్, విజువల్స్ ఓ రేంజ్‌లో ఉన్నాయి.

ఇక సంక్రాంతి కానుకగా ఈ సినిమాను జనవరి 12న విడుదల చేయనున్నారు. ప్రపంచవ్యాప్తంగా తొలిసారి ఓ భారతీయ సినిమా తెలుగు, తమిళ్, మలయాళం, కన్నడ, హిందీ, చైనీస్, జపాన్, ఇలా మొత్తం 11 భాషల్లో రిలీజ్ కానుండటం విశేషం. ఇదిలా ఉంటే ఈ సినిమాలో అమృత అయ్యర్ హీరోయిన్‌గా నటిస్తుండగా, వరలక్ష్మి శరత్ కుమార్ ముఖ్య పాత్రలో నటిస్తున్నారు. అలాగే హనుమాన్ సినిమా ప్రశాంత్ వర్మ సినిమాటిక్ యూనివర్స్‌లో భాగంగా ఉండనుంది.