முன்னணி இளம் நடிகர்களின் பட்டியலில் இடம்பெற்றுள்ள நடிகர் அதர்வா 'செம போத ஆகாதே, 'இமைக்கா நொடிகள்' போன்ற படங்களில் நடித்து வரும் நிலையில் தற்போது 'டார்லிங்' இயக்குனர் சாம் ஆண்டன் இயக்கவுள்ள அடுத்த படத்தில் நடிக்க ஒப்பந்தமாகியுள்ளார். இந்த படத்தில் அதர்வாவுக்கு ஜோடியாக நடிக்க ஹன்சிகா ஒப்பந்தம் செய்யப்பட்டுள்ளார். இந்த படத்தை அரா சினிமாஸ் நிறுவனம் தயாரிக்கவுள்ளது.

இந்த படம் குறித்து கூறிய ஆரா சினிமாஸ் காவ்யா வேணுகோபால் கூறியதாவது: 'ஒரு விநியோகத்தரான எனக்கு சுவாரஸ்யமான, பலமான கூட்டணியின் பலன் நன்கு தெரியும். சரியான நடிகர்கள் மற்றும் தொழில்நுட்ப கலைஞர்களின் தேர்வு படத்தின் பாதி வெற்றியை தீர்மானிக்கும். இப்படத்தின் கதையை இயக்குனர் சாம் ஆண்டன் என்னிடம் முதல் முறையாக சொன்ன பொழுதே இப்படத்திற்கு கதாநாயகனாக அதர்வா நடித்தால் தான் பொருத்தமாக இருக்கும் என நானும் எனது அணியும் முடிவு செய்தோம். இன்னும் பெயரிடப்படாத  இப்படம், அதர்வாவை நிச்சயம் டாப் ஹீரோக்களின் பட்டியலில் கொண்டு போய் சேர்க்கும். இளைஞர்களிடம் ஹன்சிகாவுக்கு இருக்கும் ஆதரவும் வரவேற்பும்  வியக்கத்தக்கது. இந்த புது ஜோடி வர்த்தக தரப்பிலும் ரசிகர்கள் மத்தியிலும் பெரிய வரவேற்பை பெரும்' என்று கூறினார்

சாம் CS இசையில் உருவாகவுள்ள இப்படத்தின் படப்பிடிப்பு வரும் டிசம்பர் 10 ஆம் தேதி தொடங்கவுள்ளது என்பது குறிப்பிடத்தக்கது.