இதுவரை ஜாலியான, பொழுதுபோக்கு படங்களில் நடித்து வந்த நடிகை ஹன்சிகா, முதன்முறையாக சவாலான கேரக்டரை ஏற்று நடிக்க ஒரு படத்தில் ஒப்பந்தமாகியுள்ளாஅர். 

ஜியோஸ்டார் எண்டர்பிரைசஸ் தயாரிக்கும் இந்த படம் நாயகியை மையப்படுத்தி சுழலும் திரில்லர் கதை என்றும் இந்த பவர்ஃபுல்லான நடிப்பை வெளிப்படுத்தும் கேரக்டரில் ஹன்சிகா ஹன்சிகா நடிக்கவுள்ளதாகவும் படக்குழுவினர் கூறியுள்ளனர். மசாலா படம், ரோமியோ ஜூலியட், போகன் படங்களில் இணை இயக்குனராக பணிபுரிந்த ஜமீல் கதை, திரைக்கதை எழுதி படத்தை இயக்குகிறார். 

இந்த படம் குறித்து இயக்குனர் ஜமீல் கூறியதாவது: ரசிகர்கள் பார்க்க விரும்பும் வகையில் வணிக ரீதியில் திரைக்கதையை மேம்படுத்த நிறைய உழைப்பை கொடுத்திருக்கிறோம். மிகுந்த பொறுப்பும், அர்ப்பணிப்பும் தேவைப்படுகிற இந்த கதாபாத்திரத்துக்கு முதன்மையான தேர்வாக ஹன்சிகா இருந்தார். பெருகி வரும் நாயகிகளை மையப்படுத்திய கதைகள் ட்ரெண்டும், ரசிகர்கள் மத்தியில் குறையாத ஹன்சிகாவின் புகழும் தான் இந்த படம் உருவாக முக்கிய காரணம். அவருடன் இரண்டு படங்களில் உதவி இயக்குனராக வேலை செய்திருக்கிறேன்,  அவர் என்னை ஈர்த்திருக்கிறார். அதனாலேயோ என்னவோ இந்த கதையை எழுதும்போதே அவரின் இமேஜ் இந்த கதையில் பொருந்தி விட்டது. இந்த கதையில் இன்னும் சில  கதாபாத்திரங்களுக்கும் முக்கியத்துவம் இருக்கிறது, அதற்காக பிரபலமான நடிகர்களை தேர்வு செய்து வருகிறோம். ஜியோஸ்டார் ஃபிலிம்ஸ் தயாரிப்பாளர் கோட்டீஸ்வர ராவ் மற்றும் நிர்வாக தயாரிப்பாளர் விஜய் வர்மா சிறந்த தொழில்நுட்ப கலைஞர்களை தருவதாக உறுதி அளித்திருக்கிறார்கள். ஜூன் மாதம் படப்பிடிப்பு துவங்க இருக்கிறது, படத்தின் தலைப்பு விரைவில் வெளியாகும். இவ்வாறு இயக்குனர் ஜமீல் கூறியுள்ளார்.