அரவிந்தசாமி, பிரபுதேவா, கஜோல் நடித்த 'மின்சார கனவு' படத்தை இயக்கிய இயக்குனர் மற்றும் ஒளிப்பதிவாளர் ராஜீவ் மேனன், நீண்ட இடைவெளிக்கு பின்னர் மீண்டும் தமிழில் ஒரு படம் இயக்குகிறார் என்பதை ஏற்கனவே பார்த்தோம். ஜி.வி.பிரகாஷ் நாயகனாக நடிக்கும் இந்த படத்திற்கு 'சர்வம் தாளமயம்' என்ற டைட்டில் வைக்கப்பட்டுள்ளது.

இந்த நிலையில் இந்த படத்தின் படப்பிடிப்பு இன்றுமுதல் தொடங்குகிறது என்று ஜி.வி.பிரகாஷ் தனது சமூகவலைத்தளத்தில் குறிப்பிட்டுள்ளார். இதுவொரு இசை சம்பந்தப்பட்ட திரைப்படம் என்றும், இந்தியாவின் மொசார்ட் என்று அழைக்கப்படுபவரும், எனது குருவுமான ஏ.ஆர்.ரஹ்மான் அவர்கள் இசையில் நடிப்பதில் பெருமை அடைகிறேன் என்றும் ஜி.வி.பிரகாஷ் கூறியுள்ளார்.

மேலும் 'சர்வம் தாளமயம்' திரைப்படத்தின் படப்பிடிப்பு இன்று தொடங்கவுள்ளதை அடுத்து இந்த படத்தின் ஃபர்ஸ்ட்லுக் போஸ்டரும் இணையதளங்களில் வெளியாகியுள்ளது. இந்த ஃபர்ஸ்ட்லுக்கில் ஜிவி பிரகாஷ் கழுத்தில் ருத்திராட்சமும் சிலுவையும் அணிந்துள்ளார் என்பது குறிப்பிடத்தக்கது.

லதா தயாரிக்கும் இந்த படத்திற்கு ரவி யாதவ் ஒளிப்பதிவு செய்கிறார். அந்தோணி படத்தொகுப்பில் உருவாகும் இந்த படத்தின் பாடல் ஒன்றை மறைந்த கவிஞர் நா.முத்துகுமார் எழுதியுள்ளார். மற்ற பாடல்களை மதன்கார்க்கி மற்றும் அருண்காமராஜா ஆகியோர் எழுதுகின்றனர்.