பாலாவை அடுத்து வெற்றிப்பட இயக்குனருடன் இணையும் ஜி.வி.பிரகாஷ்
- IndiaGlitz, [Monday,February 19 2018]
'டார்லிங்' படத்தில் நடிகராக அறிமுகமான பிரபல இசையமைப்பாளர் ஜி.வி.பிரகாஷ், பல படங்களில் நடித்திருந்தாலும், பாலாவின் 'நாச்சியார்' படத்தில் ரசிகர்களின் மனதில் நிற்கும் வகையான 'காத்து' என்ற கேரக்டரில் அவரது நடிப்பு அனைவராலும் பாராட்டப்பட்டது. பாலாவின் கைராசிப்படி 'நாச்சியார்' படத்திற்கு பின் ஜி.வி.பிரகாஷின் நடிப்பு மென்மேலும் மெருகேறும் என்று எதிர்பார்க்கப்படுகிறது.
இந்த நிலையில் கடந்த ஆண்டு வெளியான வெற்றிப்படங்களில் ஒன்றான லேடி சூப்பர் ஸ்டார் நயன்தாரா நடித்த 'அறம்' படத்தை இயக்கிய கோபி நயினார் இயக்கவுள்ள அடுத்த படத்தில் ஜி.வி.பிரகாஷ் நடிக்கவுள்ளதாக செய்திகள் வெளிவந்துள்ளது.
இந்த படம் வடசென்னையை மையமாக கொண்டது என்பது மட்டுமின்றி கால்பந்து விளையாட்டு குறித்த பரபரப்பான படம் என்று கூறப்படுகிறது. இந்த படத்திற்கு 'கருப்பர் நகரம்' என்ற டைட்டில் வைக்கப்பட்டுள்ளதாக கூறப்படுகிறது. எனினும் இந்த படத்தின் அதிகாரபூர்வ அறிவிப்பு வரும் வரை பொறுமை காப்போம்.