ఏటీఎం మిషన్‌లో డబ్బులు రీఫిల్ చేస్తుండగా.. గుర్తు తెలియని వ్యక్తి కాల్పులు జరిపి డబ్బులను దోచుకెళ్లిన ఘటన హైదరాబాద్ కూకట్‌పల్లిలో జరిగింది. హెచ్‌డీఎఫ్‌సీ బ్యాంకు వద్ద ఆగంతకులు కాల్పులు జరిపారు. ఒక్కసారిగా కాల్పులకు తెగబడటంతో స్థానికులు భయాందోళనకు గురయ్యారు. స్థానిక హెచ్‌డీఎఫ్‌సీ బ్యాంకు ఏటీఎం మిషన్‌లో డబ్బులు రీఫిల్ చేస్తుండగా.. అక్కడ ఉన్న సెక్యూరిటీ గార్డుతో పాటు ఏటీఎం సిబ్బందిపై ఆగంతకుడు కాల్పులు జరిపాడు.

ఘటనలో సెక్యూరిటీ గార్డుతో పాటు ఏటీఎం సిబ్బంది ఒకరికి తీవ్ర గాయాలయ్యాయి. తాము డబ్బులు రీఫిల్ చేస్తుండగా ఒక్కసారిగా వచ్చిన ఆగంతకుడు తమపై కాల్పులు జరిపాడని సెక్యూరిటీ సిబ్బంది తెలిపారు. గాయపడిన ఇద్దరినీ చికిత్స నిమిత్తం ఆసుపత్రికి తరలించారు. స్థానికుల సమాచారం మేరకు పోలీసులు ఘటనా స్థలాన్ని సందర్శించారు. కేసు నమోదు చేసి దోపిడీకి పాల్పడ్డ నిందితుల కోసం పోలీసులు గాలింపు చర్యలు చేపట్టారు.