பெங்களூரில் ஏ.டி.எம் பணத்துடன் காணாமல் போன வேன் கண்டுபிடிப்பு
- IndiaGlitz, [Thursday,November 24 2016]
நேற்று பெங்களூரில் உள்ள கே.ஜி. சாலையில் உள்ள பேங்க் ஆப் இந்தியா ஏ.டி.எம்-க்கு பணம் நிரப்ப வந்த வேன் ரூ.1.37 கோடியுடன் மாயமாய் மறைந்த செய்தியை பார்த்தோம். இந்நிலையில் இன்று காணாமல் போன வேனை போலீசார் கண்டுபிடித்துள்ளனர். தலைமறைவாகியுள்ள டிரைவரை பிடிக்க போலீஸார் தகுந்த நடவடிக்கை எடுத்து வருகின்றனர்.
நேற்று காணாமல் போன வேன், பெங்களூருவில் உள்ள வசந்த் நகர் என்ற பகுதியில் நிற்பதாக போலீசாருக்கு கிடைத்த தகவலை அடுத்து போலீசார் அங்கு விரைந்து சென்று வேனை கைப்பற்றினர். அந்த வேனில் ரூ 45 லட்சமும், துப்பாக்கியும் இருந்ததாக போலீசார் தரப்பில் கூறியுள்ளனர். இந்த பணம் முழுவதும் புதிய ரூ.2000 நோட்டு என்பது குறிப்பிடத்தக்கது.
மீதிப் பணமான ரூ.92 லட்சத்துடன் டிரைவர் தலைமறைவாகியுள்ளதால், டிரைவரை பிடிக்க போலீஸார் தீவிர வேட்டையில் இறங்கியுள்ளனர்.