முதன்முதலாக இணையும் கவுண்டமணி-சந்தானம்
- IndiaGlitz, [Tuesday,April 19 2016]
கடந்த 1980கள் மற்றும் 90களில் காமெடி நடிகர் கவுண்டமணி நடிக்காத படமே இல்லை என்று கூறும் அளவுக்கு ஒரே நேரத்தில் பல படங்களில் நடித்து வந்தார். அவருடைய எகத்தாளமான வசன உச்சரிப்பும், இன்னோசென்ஸாக கலாய்க்கும் திறமையும் ரசிகர்களால் ரசிக்கப்பட்டது.
கவுண்டமணியின் பாணியை கொஞ்சம் காலத்திற்கு தகுந்தாற்போல் மாற்றி தற்போது சந்தானம் நடித்து வந்தாலும் இதுவரை இரண்டுபேரும் இணைந்து ஒரு படத்திலும் நடிக்கவில்லை. இந்நிலையில் தற்போது இருவரும் ஒரே மேடையில் இணையும் ஒரு வாய்ப்பு கிடைத்துள்ளது.
ஆம் கவுண்டமணி ஹீரோவாக நடித்துள்ள 'எனக்கு வேறு எங்கும் கிளைகள் கிடையாது' படத்தின் இசை வெளியீட்டு விழா இன்று சென்னையில் நடைபெறவுள்ளது. இந்த இசை வெளியீட்டு விழாவில் சிறப்பு விருந்தினராக சந்தானம் கலந்து கொள்ளவுள்ளார்.
கோலிவுட் திரையுலகின் இரண்டு பெரிய காமெடி நட்சத்திரங்கள் ஒரே மேடையில் பேசப்போவதை கேட்க ஆவலுடன் இருப்பதாக இந்த படத்தின் மூலம் இயக்குனராக அறிமுகம் ஆகும் கணபதி தெரிவித்துள்ளார்.