కుటుంబకథా చిత్రాల్లోనే మాస్, యాక్షన్ అంశాలను కూడా ఉండేటట్లు చూసుకునే క‌థానాయ‌కుడు గోపీచంద్. ఇటువంటి కథలతోనే ఒకప్పుడు వరుస హిట్లను అందుకున్న ఈ యాక్ష‌న్‌ హీరోకి.. 'లౌక్యం' త‌రువాత చేసిన సినిమాలేవీ విజ‌యాల‌ను అందించ‌లేక‌పోయాయి. ప్రస్తుతం డెబ్యు డైరెక్టర్ చక్రి దర్శకత్వంలో ఒక యాక్షన్ ఎంట‌ర్‌టైన‌ర్‌ని చేస్తున్నారు గోపీచంద్. మెహ్రీన్ కథానాయికగా నటిస్తున్న ఈ చిత్రాన్ని'బెంగాల్ టైగర్' నిర్మాత రాధామోహన్ నిర్మిస్తున్నారు.

ఇదిలా వుంటే...గోపీచంద్ మరో రెండు సినిమాలకి కూడా గ్రీన్ సిగ్నల్ ఇచ్చినట్లు సమాచారం. రచయిత నుంచి ద‌ర్శ‌కుడిగా మారి బిందాస్‌, ర‌గ‌డ‌, దూసుకెళ్తా వంటి విజ‌యాల‌ను అందుకున్న‌ వీరు పోట్లతో ఒక సినిమా చేయనున్నారు గోపీచంద్. ఈ సినిమాని 'సాహసం' నిర్మాత బి.వి.ఎస్.ఎన్.ప్రసాద్ నిర్మించ‌నున్నార‌ని తెలిసింది. చక్రి ద‌ర్శ‌క‌త్వంలో రూపొందుతున్న‌ సినిమా తర్వాత ఈ చిత్రాన్ని తెరకెక్కించనున్నారు. అలాగే తమిళ దర్శకుడు తిరు దర్శకత్వంలో కూడా గోపీ ఓ మూవీ చేయబోతున్నారు.

ఈ మాస్ ఎంట‌ర్‌టైన‌ర్‌ని 'స్వామి రా రా', 'ఒక్క క్షణం' చిత్రాలను నిర్మించిన చక్రి చిగురుపాటి నిర్మించనున్నారు. ఈ సినిమా వచ్చే ఏడాది పట్టాలెక్కనుంద‌ని స‌మాచార‌మ్‌. మరి ఈ సినిమాలతోనైనా గోపీచంద్ విజయం అందుకుంటారేమో చూడాలి.