தளபதி விஜய் நடிப்பில் அட்லி இயக்கத்தில் உருவாகவுள்ள 'தளபதி 63; படத்தின் அதிகாரபூர்வ அறிவிப்புக்கு பின் இந்த படத்தின் ஆரம்பகட்ட பணிகள் விறுவிறுப்பாக நடைபெற்று வருகிறது. இந்த படத்தின் படப்பிடிப்பு விரைவில் தொடங்கவுள்ள நிலையில் இந்த படத்தின் தொழில்நுட்ப கலைஞர்களின் தேர்வு நடைபெற்று வருகிறது.

அந்த வகையில் தற்போது 'தளபதி 63' படத்தின் போஸ்டர் டிசைனராக கோபி பிரசன்னா இணைந்துள்ளார். இவர் ஏற்கனவே விஜய் நடித்த 'கத்தி', 'தெறி', ''மெர்சல்' மற்றும் 'சர்கார்' ஆகிய நான்கு படங்களில் பணிபுரிந்து தற்போது ஐந்தாவது முறையாக தளபதியுடன் இணைகிறார் என்பது குறிப்பிடத்தக்கது.

விஜய், நயன்தாரா, விவேக், யோகிபாபு, உள்பட பலர் நடிக்கும் இந்த படத்திற்கு ஆஸ்கார் நாயகன் ஏ.ஆர்.ரஹ்மான் இசையமைக்கவுள்ளார். ஏஜிஎஸ் நிறுவனம் பிரமாண்டமாக தயாரிக்கும் இந்த படம் வரும் 2019ஆம் ஆண்டு தீபாவளி அன்று திரைக்கு வரவுள்ளது.