ప్రభాస్ ఫ్యాన్స్ పండగ చేసుకునే వార్త ఒకటి సినీ పరిశ్రమలో చక్కర్లు కొడుతోంది. సంక్రాంతి పండుగకు కొనసాగింపు అన్నట్టుగా.. తన 20వ చిత్రానికి సంబంధించిన తాజా అప్‌డేట్‌ను యంగ్ రెబల్ స్టార్ ఇవ్వనున్నాడని సమాచారం. జిల్ ఫేమ్ రాధాకృష్ణ దర్శకత్వంలో ప్రభాస్ తాజా చిత్రం రూపొందుతున్న విషయం తెలిసిందే. సాహో తర్వాత ఈ సినిమాకు సంబంధించిన వర్కులు నడుస్తున్నప్పటికీ.. అధికారిక ప్రకటన మాత్రం ఇప్పటి వరకు రాలేదు. అయితే శుక్రవారం ప్రభాస్ తన మౌనాన్ని వీడనున్నట్టు తెలుస్తోంది. ఇప్పటికే జాన్ అనే పేరుతో ప్రచారంలో ఉన్న ఈ సినిమాపై ఎలాంటి అప్ డేట్ రానుందోనన్న ఆసక్తి అందరిలోనూ నెలకొంది. ఫ్యాన్స్‌లో ఉన్న అసంతృప్తిని తొలగించేందుకు ప్రభాస్ తన తాజా ప్రకటన చేయనున్నాడు.

ప్రభాస్ సొంత బ్యానర్ గోపీకృష్ణ మూవీస్‌తో పాటు యూవీ ప్రొడక్షన్స్ సంయుక్తంగా ఈ సినిమా నిర్మిస్తున్నాయి. 1920ల నాటి కథాంశంగా చెబుతున్నారు. యూరప్‌లో జరిగే కథ అన్న ప్రచారం ఉంది. అయితే హీరోయిన్, ఇతర నటీనటులు, సాంకేతికవర్గంపై పూర్తి వివరాలు తెలియాల్సి ఉంది.