ఒక‌టి కాదు రెండు కాదు.. వ‌రుస‌గా ఎనిమిది చిత్రాల‌తో బాక్సాఫీస్ వ‌ద్ద విజ‌యాల దండ‌యాత్ర చేశాడు యువ క‌థానాయ‌కుడు నాని. ఎవ‌డే సుబ్ర‌మ‌ణ్యంతో మొద‌లుపెట్టి.. గ‌త చిత్రం ఎం.సి.ఎ వ‌ర‌కు వ‌రుస విజ‌యాల‌తో జైత్ర‌యాత్ర సాగిస్తున్న ఈ యంగ్ టాలెంటెడ్ హీరో.. అతి త్వ‌ర‌లో కృష్ణార్జున యుద్ధంతో ప‌ల‌క‌రించ‌నున్నాడు.

వెంక‌టాద్రి ఎక్స్‌ప్రెస్‌, ఎక్స్ ప్రెస్ రాజా చిత్రాల ద‌ర్శ‌కుడు మేర్ల‌పాక గాంధీ తెర‌కెక్కిస్తున్న ఈ చిత్రంలో అనుప‌మ ప‌ర‌మేశ్వ‌ర‌న్ క‌థానాయిక‌గా న‌టిస్తోంది. ఇటీవ‌ల కృష్ణ‌, అర్జున పాత్ర‌ల తాలుకూ ఫస్ట్ లుక్‌ల‌ను, దారి చూడు అనే సింగిల్‌ని చిత్ర‌బృందం విడుద‌ల చేయ‌గా.. వీటికి మంచి రెస్పాన్స్ వ‌చ్చింది.

ఇదిలా ఉంటే.. ఈ సినిమాకి ఓవ‌ర్సీస్‌లో మంచి డీల్ కుదిరింద‌ని విశ్వ‌సనీయ వ‌ర్గాలు పేర్కొంటున్నాయి. మాగ్న‌స్ మీడియా రూ.4.14 కోట్ల‌కు ఓవ‌ర్సీస్ రైట్స్ సొంతం చేసుకుంద‌ని ట్రేడ్ వ‌ర్గాలు పేర్కొంటున్నాయి. ప్ర‌స్తుతం నాని ఉన్న ఫామ్ చూస్తుంటే.. ఈ మొత్తం రాబ‌ట్ట‌డం పెద్ద క‌ష్ట‌మేమీ కాదంటున్నారు వారు. కాగా, ఈ సినిమా ఏప్రిల్ 12న ప్రేక్ష‌కుల ముందుకు రానుంది.