தளபதி விஜய் நடித்த ‘கோட்’ திரைப்படத்தில் ஒரு சூப்பர் ஹிட் பாடலுக்கு நடன இயக்குனராக பணியாற்றிய சேகர் மாஸ்டர், தளபதி 69 படத்திலும் ஒரு பாடலுக்காக நடன இயக்குனராக பணியாற்ற இருப்பதாக வெளிவந்த தகவல், ரசிகர்களுக்கு மகிழ்ச்சியை ஏற்படுத்தியுள்ளது.

தளபதி விஜய் நடிப்பில், எச். வினோத் இயக்கத்தில், அனிருத் இசையமைக்க, உருவாகும் ’தளபதி 69’ படத்தின் படப்பிடிப்பு விரைவில் தொடங்க உள்ள நிலையில், இதில் நடிக்கும் நட்சத்திரங்களை குறித்த அறிவிப்புகள் வெளியாகி வருகின்றன. நேற்று, முதல் கட்டமாக பிரபல பாலிவுட் நடிகர் பாபி தியோல் இந்த படத்தில் இணைந்ததாக அதிகாரப்பூர்வமாக அறிவிக்கப்பட்டது. மேலும், இன்னும் நான்கு பிரபல நட்சத்திரங்களின் அறிவிப்பு விரைவில் வெளியாகும் என்று கூறப்படுகிறது.

இந்த நிலையில், ’தளபதி 69’ படத்தின் படப்பிடிப்பு அக்டோபர் 5 ஆம் தேதி தொடங்கவுள்ளது. முதல் கட்டமாக, ஒரு பாடல் காட்சியை படமாக்க இருப்பதாக கூறப்பட்டுள்ள நிலையில், அந்த பாடலின் நடன இயக்குனராக சேகர் மாஸ்டர் பணிபுரிவார் எனத் தகவல் வெளியாகியுள்ளது. ஏற்கனவே, இவர் ‘கோட்’ படத்தில் விஜய் - திரிஷா நடனமாடிய 'மட்ட' பாடலுக்கு நடன இயக்குனராக பணியாற்றிய அனுபவம் பெற்றவர் என்பதால், தளபதி 69 படத்திலும் அவர் பட்டையை கிளப்புவார் என்று எதிர்பார்க்கப்படுகிறது.

அனிருத் இசையில் உருவாகும் இந்த பாடல் ரசிகர்களிடையே மிகப்பெரிய வரவேற்பை பெறும் என்று எதிர்பார்க்கப்படுகிறது.