சினிமாவில் வாய்ப்பு தருவதாக கூறி பாலியல் பலாத்காரம்: பிரபல இயக்குனர் மீது இளம்பெண் புகார்..!
- IndiaGlitz, [Saturday,October 12 2024]
சினிமாவில் வாய்ப்பு வருவதாக கூறி, பிரபல இயக்குனர் ஒருவரும் அவருடைய நண்பரும் தன்னை பாலியல் பலாத்காரம் செய்ததாக, இளம் பெண் ஒருவர் காவல்துறையில் புகார் அளித்துள்ளது பரபரப்பை ஏற்படுத்தியுள்ளது.
கடந்த சில நாட்களுக்கு முன், மலையாள திரையுலகில் நடிகைகள் பாலியல் பலாத்காரம் செய்யப்பட்டது உண்மை என, ஹேமா கமிஷன் அறிக்கை வெளியிட்டது. அந்த அறிக்கையின் அடிப்படையில், சில பிரபல இயக்குநர்கள் மற்றும் நடிகர்கள் மீது காவல்துறையினர் வழக்குப்பதிவு செய்து, விசாரணை செய்து வருகின்றனர் என்பதை ஏற்கனவே பார்த்தோம்.
இந்த நிலையில், தற்போது பிரபல இயக்குனர் சுரேஷ் திருவல்லா மற்றும் அவரது நண்பர் விஜித் விஜயகுமார் ஆகிய இருவர் மீது, காவல் நிலையத்தில் இளம் பெண் ஒருவர் பாலியல் புகார் அளித்துள்ளார்.
சினிமாவில் நடிக்க வாய்ப்பு வாங்கி தருவதாகவும், தன்னை திருமணம் செய்துகொள்வதாகவும் கூறி, விஜய் தன்னை இரண்டு முறை பாலியல் பலாத்காரம் செய்ததாகவும், அதேபோல் தன்னை அட்ஜஸ்ட் செய்யுமாறு இயக்குநர் சுரேஷ் திருவல்லா வலியுறுத்தியதாகவும் அந்த புகாரில் இளம்பெண் தெரிவித்துள்ளார்.
இந்த புகாரின் அடிப்படையில், போலீசார் இருவர் மீதும் பாலியல் வன்கொடுமை வழக்கு பதிவு செய்து, விசாரணை செய்து வருகின்றனர். இந்த புகார், மலையாள திரையுலகில் பெரும் அதிர்ச்சியை ஏற்படுத்தியுள்ளது.