அஜீத் படத்திற்காக விருது வாங்குவேன். அனிருத்
- IndiaGlitz, [Monday,August 31 2015]
ஐஸ்வர்யா தனுஷ் இயக்கிய '3' படத்தின் மூலம் இசையமைப்பாளராக அறிமுகமான அனிருத் குறுகிய காலத்தில் தனது திறமையால் அபார வளர்ச்சி அடைந்த ஒரு இசையமைப்பாளர். இசைத்துறைக்கு வந்த சில வருடங்களிலேயே விஜய், அஜீத் என இருவரின் படங்களுக்கும் இசையமைக்க வாய்ப்பு பெற்ற ஒரே இசையமைப்பாளர் இவர்தான் என்பது குறிப்பிடத்தக்கது.
விஜய் நடித்த 'கத்தி' படத்திற்கு இசையமைத்த அனிருத் தற்போது அஜீத் நடித்து வரும் 'தல 56' படத்திற்கு இசையமைத்து வருகிறார். இந்த படத்தின் பாடல்களை அனிருத் கம்போஸ் செய்து முடித்துவிட்டதாகவும், இந்த டியூன்களை சமீபத்தில் அஜீத் கேட்டு, அனிருத்தை வெகுவாக பாராட்டியதாகவும் தகவல்கள் வெளிவந்துள்ளன.
இந்நிலையில் சமீபத்தில் துபாயில் நடைபெற்ற SIIMA விருது விழாவில் பேசிய அனிருத், 'அஜீத் சார் படத்தில் இசையமைத்ததற்காக கண்டிப்பாக எனக்கு அடுத்த வருடம் SIIMA விருது கிடைக்கும் என நம்புகிறேன். அதற்காக நான் கடுமையாக உழைத்து கொண்டிருக்கின்றேன்' என்று கூறியுள்ளார். அனிருத் இவ்வாறு கூறியதும் அங்கிருந்த ரசிகர்கள் ஆரவாரம் செய்து அனிருத்தை வாழ்த்தினர்.