கடந்த சில நாட்களுக்கு முன்னர் விக்ரம் மகன் துருவ் நடிக்கும் 'வர்மா' படத்தில் நாயகியாக கவுதமி மகள் சுப்புலட்சுமி நடிக்கவிருப்பதாக செய்திகள் வெளிவந்தது. ஆனால் இந்த தகவல் உண்மை அல்ல என்று கவுதமி தனது சமூக வலைத்தளத்தில் விளக்கிய பின்னர் இந்த வதந்தி முடிவுக்கு வந்தது. இந்த நிலையில் சுப்புலட்சுமியின் எதிர்காலம் என்ன? அவர் சினிமாவுக்கு வருவாரா? அப்படியே வந்தாலும் நடிகையாவாரா? என்பது குறித்து நமக்கு அளித்த பிரத்யேக பேட்டியில் கூறியதாவது:

எனது மகள் இப்போதுதான் 12ஆம் வகுப்பு முடித்துள்ளார். அவர் இப்போது தன்னை மேல்படிப்புக்காக தயார்படுத்தி வருகிறார். அவருக்கு சினிமா சம்பந்தமான படிப்புகளை படிக்க ஆர்வம் அதிகம். நன்றாக எழுதுவார், தொழில்நுட்ப விஷயங்களை கற்று கொள்வதில் மிகுந்த ஆர்வத்தில் உள்ளார். எனவே அவர் இப்போதைக்கு நடிகை ஆவார் என்று எனக்கு தோன்றவில்லை. ஆனால் அதே நேரத்தில் அவருடைய ஜீனில் நடிப்பு உள்ளது. எனவே அவர் நடிக்க வருவது குறித்த முடிவை எதிர்காலத்தில் எடுக்கலாம்.

என்னுடைய மகளை 3 வயதில் இருந்தே அவருக்கு என்ன பிடிக்குமோ அதையே செய்ய அனுமதித்து வருகிறேன். அவருடைய தேவைகளுக்கு அவரே முடிவு செய்வார். படிப்பு முதல் உடை வரை அவருடைய விருப்பத்தில் தான் உள்ளது. எனவே எதிர்காலத்தில் அவர் நடிகையாகவோ அல்லது தொழில்நுட்ப கலைஞராகவோ மாற முடிவு செய்தால் அதற்கு எந்த தடையும் இருக்காது' என்று கூறினார்.